''എന്‍റെ പേര്​ സാർ എന്നല്ല, രാഹുൽ എന്ന്​ വിളിക്കൂ'' -രാഹുൽ ഗാന്ധിയുടെ വാക്കുകൾക്ക്​ ഹർഷാരവം മുഴക്കി വിദ്യാർഥിനികൾ

ന്യൂഡൽഹി: ചോദ്യം ചോദിക്കാനായി സാർ എന്ന്​ വിളിച്ച വിദ്യാർഥിനിയോട്​ തന്നെ പേര്​ വിളിച്ചാൽ മതിയെന്ന്​ തിരുത്തി കോൺഗ്രസ്​ നേതാവ്​ രാഹുൽ ഗാന്ധി. പുതുച്ചേരിയിൽ ഭാരതി ദാസൻ സർക്കാർ വനിത കോളജിൽ വിദ്യാർഥിനികളുമായി സംവദിക്കുകയായിരുന്നു രാഹുൽ.

സദസ്സിൽ നിന്ന്​ ചോദ്യം ചോദിക്കാനായി ഒരു വിദ്യാർഥിനി രാഹുൽ ഗാന്ധിയുടെ ശ്രദ്ധ ക്ഷണിച്ച​പ്പോഴായിരുന്നു രസകരമായ മുഹൂർത്തം. 'സാർ, ഞാനിവിടെയുണ്ട്​' എന്ന്​ പറഞ്ഞുകൊണ്ട്​ ചോദ്യത്തിലേക്ക്​ കടക്കുന്ന വിദ്യാർഥിനിയെ രാഹുൽ തിരുത്തുകയായിരുന്നു.

''നോക്കൂ, എന്‍റെ പേര്​ സാർ എന്നല്ല. ഒ.കെ? എന്‍റെ പേര്​ രാഹുൽ, അതുകൊണ്ട് ദയവായി​ എന്നെ രാഹുൽ എന്ന്​ വിളിക്കൂ.. നിങ്ങൾക്ക്​ നിങ്ങളുടെ പ്രിൻസിപ്പലിനെ സാർ എന്ന്​ വിളിക്കാം, അധ്യാപകരെ സാർ എന്ന്​ വിളിക്കാം, എന്നെ നിങ്ങൾ രാഹുൽ എന്ന്​ വിളിക്കൂ'' - രാഹുൽ ഗാന്ധി പറഞ്ഞു.

വിദ്യാർഥിനികൾ ഹർഷാരവങ്ങളോടെയാണ്​ രാഹുൽ ഗാന്ധിയുടെ വാക്കുകളെ വരവേറ്റത്. ഇതിനിടെ ''അവർക്ക്​ നിങ്ങ​െള രാഹുൽ അണ്ണാ എന്ന്​ വിളിച്ചൂടെ' എന്ന്​ രാഹുലിന്‍റെ പിന്നിൽ നിന്ന്​ ചോദ്യം വന്നു. ''ശരി, നിങ്ങൾക്ക്​ എന്നെ രാഹുൽ അണ്ണാ എന്ന് വിളിക്കാം, അതാണ്​ നല്ലത്​''- രാഹുൽ മറുപടി നൽകിയ​േതാടെ 'രാഹുൽ അണ്ണാ' എന്ന്​ വിളിച്ചാണ്​ വിദ്യാർഥിനി ചോദ്യത്തിലേക്ക്​ കടന്നത്​.

മേയിൽ നടക്കുന്ന നിയമസഭ തെരഞ്ഞെടുപ്പിന്​ മുന്നോടിയായി കോൺഗ്രസി​ന്‍റെ തെരഞ്ഞെടുപ്പ്​ പ്രചാരണത്തിനായി ബുധനാഴ്ചയാണ്​ രാഹുൽ ഗാന്ധി പുതുച്ചേരിയിലെത്തിയത്​.