മുംബൈയിൽ കനത്ത മഴയും മണ്ണിടിച്ചിലും; മരണം 20 കടന്നു

മുംബൈ: കനത്ത മഴ തുടരുന്ന മുംബൈയിൽ പ്രളയത്തിലും മണ്ണിടിച്ചിലിലും 20ലേറെ മരണം സംഭവിച്ചതായി ദേശീയ മാധ്യമങ്ങൾ. നിരവധി പേരെ കാണാതായി. മുംബൈയിലെ ചേംബൂര, വിക്രോളി പാർക്​ ഭാഗങ്ങളിലാണ്​ പുലർച്ചെ സമയത്ത്​ മണിക്കൂറുകൾ നിർത്താതെ പെയ്​ത മഴയിൽ മണ്ണിടിച്ചിലുണ്ടായത്​. ഇവിടെ നിരവധി പേരെ കാണാതായിട്ടുണ്ട്​. 15 പേരെ ഇതിനകം രക്ഷപ്പെടുത്തിയതായി അധികൃതർ അറിയിച്ചു. മഹാരാഷ്​ട്ര മുഖ്യമന്ത്രി ഉദ്ധവ്​ താക്കറെ വൈകീട്ട്​ ആറുമണിക്ക്​ പ്രത്യേക യോഗം വിളിച്ചിട്ടുണ്ട്​.

മുംബൈ നഗരത്തിൽ ഇന്നലെ രാത്രി എട്ടുമണിക്കും രണ്ടുമണിക്കും ഇടയിൽ 156.94 സെന്‍റിമീറ്റർ റെക്കോർഡ്​ മഴയാണ്​ ഉണ്ടായത്​. ചുനഭത്തി, സിയോൺ, ദാദർ, ഗാന്ധി മാർകറ്റ്​, ചേംബൂർ, കുർള എൽ.ബി.എസ്​ റോഡ്​ എന്നിവിടങ്ങളിൽ പ്രളയം രൂക്ഷമായി തുടരുകയാണ്​. നഗരത്തിന്‍റെ പല ഭാഗങ്ങളിലും റോഡ്​ ഗതാഗതം മുടങ്ങി. ബോറിവലിയിൽ പ്രളയപ്പാച്ചിലിൽ വാഹനങ്ങൾ ഒലിച്ചുപോയി. ട്രെയിൻ ഗതാഗതവും തടസ്സപ്പെട്ടു.

വരുന്ന അഞ്ചുദിവസങ്ങളിലും കനത്ത മഴയുണ്ടാകുമെന്നാണ്​ വിലയിരുത്തൽ​. ശനിയാഴ്ച പുലർച്ചെ ആരംഭിച്ച മഴയാണ്​ നഗരത്തെ വെള്ളത്തിൽ മുക്കിയത്​.