അംബാനിക്ക്​ ഭീഷണി: ക്രൈംബ്രാഞ്ച്​ ഉദ്യോഗ​സ്ഥ​നെ റിമാൻഡ്​ ചെയ്​തു; 25 വരെ എൻ.ഐ.എ കസ്റ്റഡിയിൽ

മുംബൈ: മുകേഷ്​ അംബാനിയുടെ വീടിനടുത്ത്​ സ്​ഫോടക വസ്​തുക്കളുമായി കാർ കണ്ടെത്തിയ കേസിൽ എൻ.െഎ.എ അറസ്റ്റ്​ ചെയ്​ത ക്രൈംബ്രാഞ്ച്​ ഉദ്യോഗസ്​ഥൻ സച്ചിൻ വാസെയെ കോടതി റിമാൻഡ്​ ചെയ്​തു. മാർച്ച് 25 വരെയാണ്​ പ്രത്യേക എൻ.ഐ.എ കോടതി റിമാൻഡ് ചെയ്​തത്​​.

14 ദിവസത്തെ റിമാൻഡ്​ ആണ്​ ദേശീയ അന്വേഷണ ഏജൻസി (എൻ.ഐ.എ) ആവശ്യപ്പെട്ടതെങ്കിലും 11 ദിവസമാണ്​ കോടതി അനുവദിച്ചത്​. സച്ചിൻ വാസേ കുറ്റം സമ്മതിച്ചതായി എൻ.ഐ.എയുടെ അഭിഭാഷകൻ അറിയിച്ചു. ഏറ്റുമുട്ടൽ വിദഗ്​ധനായി അറി​യപ്പെടുന്ന സച്ചിൻ വാസേക്ക്​ സ്​ഫോടക വസ്​തുക്കളുമായി കാർ കൊണ്ടിട്ട സംഭവത്തിലുള്ള​ പങ്ക്​ വ്യക്​തമായതാടെയാണ്​ അറസ്​റ്റ്​ ചെയ്​തതെന്നും അഭിഭാഷകൻ അറിയിച്ചു.

ശനിയാഴ്​ച രാവിലെ 11 മണിയോടെ കസ്റ്റഡിയിലെടുത്ത ഇയാളെ നീണ്ട 12 മണി​ക്കൂർ ചോദ്യം ചെയ്യലിനു ശേഷമാണ്​ അർധരാത്രിയോടെ അറസ്റ്റ്​ രേഖപ്പെടുത്തിയത്​. എൻ.ഐ.എ ഇൻസ്​പെക്​ടർ ജനറൽ അനിൽ ശുക്ലയുടെ നേതൃത്വത്തിലുള്ള സംഘം എൻ.ഐ.എ മുംബൈ ഓഫീസിൽ വിളിച്ചുവരുത്തിയാണ്​ അറസ്റ്റ്​ ചെയ്​തത്​.

സ്​ഫോടക വസ്​തു നിറച്ച കാർ കണ്ടെത്തിയ സംഭവം ആദ്യം അന്വേഷിച്ചിരുന്നത്​ സച്ചിൻ വാസെയാണ്​. പിന്നീടാണ്​ കേസ്​ തീവ്രവാദ വിരുദ്ധ സ്​ക്വാഡിനും ശേഷം എൻ.​െഎ.എ​ക്കും കൈമാറുന്നത്​.

വിവാദ സ്​കോർപിയോയുടെ ഉടമ മൻസുഖ്​ ഹിരേ‍െൻറ മരണത്തിൽ പ്രഥമദൃഷ്​ട്യാ അസി. ഇൻസ്​പെക്​ടർ സച്ചിൻ വാസെക്ക്​ പങ്കുണ്ടെന്ന്​ മഹാരാഷ്​ട്ര എ.ടി.എസ് കോടതിയിൽ പറഞ്ഞിരുന്നു​. അറസ്​റ്റ്​ ഭയന്ന് സച്ചിൻ താണെ സെഷൻസ്​ കോടതിയിൽ നൽകിയ മുൻകൂർ ജാമ്യാപേക്ഷയെ എതിർത്താണ്​ എ.ടി.എസ്​ ഇത്​ പറഞ്ഞത്​. ചോദ്യംചെയ്യൽ അനിവാര്യമാണെന്നും അതിന്​ കസ്​റ്റഡി ആവശ്യമാണെന്നും കോടതിയും വിലയിരുത്തി. തൊട്ടുപിന്നാലെയാണ്​ അറസ്​റ്റ്​.

ഹിരേനെ സച്ചിൻ വാസെ കൊലപ്പെടുത്തിയതാണെന്നും കഴിഞ്ഞ 27 നും 28നും ഹിരേൻ സച്ചിനൊപ്പമായിരുന്നുവെന്നും വിവാദ സ്​കോർപിയോ നവംബർ മുതൽ ഫെബ്രുവരി അഞ്ചു​വരെ സച്ചി‍െൻറ കൈവശമായിരുന്നെന്നും ഹിരേ‍െൻറ ഭാര്യ വിമല ആരോപിച്ചിരുന്നു.

ഇതിനിടെ, ലോകത്തോട്​ 'ഗുഡ്​ബൈ' പറയാൻ സമയം അടുത്തുവരികയാണെന്നും 2004 ആവർത്തിക്കുകയാണെന്നും സഹപ്രവർത്തകർ കെണിയൊരുക്കുകയാണെന്നുമുള്ള സച്ചി‍െൻറ വാട്​സ്​ ആപ്പ്​ സ്​റ്റാറ്റസ്​ വൈറലായി. സ്​ഫോടന കേസ്​ പ്രതി ഖ്വാജ യൂനുസ്​ കസ്​റ്റഡി മരണ കേസിൽ 2004 സച്ചിൻ അറസ്​റ്റിലും തുടർന്ന്​ സസ്​പെൻഷനിലുമായിരുന്നു. കഴിഞ്ഞ ജൂണിലാണ്​ ജോലിയിൽ തിരിച്ചെടുത്തത്​.

അംബാനിയുടെ വസതിയായ ആന്‍ലിയക്കു സമീപം കാർമിഷേൽ റോഡിൽ ഫെബ്രുവരി 25നാണ്​​ സ്​ഫോടക വസ്​തു നിറച്ച കാർ നിർത്തിയിട്ട നിലയിൽ കണ്ടത്​. അംബാനി കുടുംബത്തെയാണോ യഥാർഥത്തിൽ ലക്ഷ്യമിട്ടതെന്ന് വ്യക്​തമല്ല. കാറിൽ 20 ജെലാറ്റിൻ സ്റ്റിക്കുകളും ഒരു ഭീഷണി കത്തുമായിരുന്നു ഉണ്ടായിരുന്നത്​. മറ്റു സ്​ഫോടക വസ്​തുക്കളോ ടൈമറോ കണ്ടെത്തിയിരുന്നില്ല.

സ്​കോർപിയോ കാറിന്‍റെ ഉടമ മൻസൂഖ്​ ഹിരൻ എന്ന 48 കാരൻ മാർച്ച്​ ആദ്യ വാരം കൊല്ലപ്പെട്ട നിലയിൽ കണ്ടെത്തിയിരുന്നു. ഒരാഴ്​ച മുമ്പ്​ തന്‍റെ ​വാഹനം മോഷണം പോയതായി മൻസൂഖ്​ പൊലീസിന്​ നേരത്തെ മൊഴി നൽകിയിരുന്നു.