മുംബൈയിൽ കെട്ടിടത്തിന്​ തീപിടിച്ച്​ രണ്ടു സ്ത്രീകൾ മരിച്ചു

മുംബൈ: മുംബൈയിലെ ബഹുനില കെട്ടിടത്തിലുണ്ടായ തീപിടിത്തത്തിൽ രണ്ട്​ സ്​ത്രീകൾ വെന്തുമരിച്ചു.സബർബൻ കാന്തിവാലിയിൽ 15 നില കെട്ടിടത്തിന്‍റെ 14–ാം നിലയിലുണ്ടായ തീപിടിത്തത്തിലാണ്​ രണ്ട് സ്ത്രീകൾ കൊല്ലപ്പെട്ടത്​.

ഏഴുപേരെ രക്ഷിച്ചു. മഥുരദാസ് റോഡിലുള്ള ഹൻസ ഹെറിറ്റേജ്​ കെട്ടിടത്തിലാണ് തീപിടുത്തം ഉണ്ടായത്​.

രണ്ടു സ്ത്രീകളുടെയും മൃതദേഹങ്ങൾ പൂർണമായും പൊള്ള​േലറ്റ നിലയിലാണ്​ കണ്ടെത്തിയത്​. തുടർന്ന്​ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.

പൊലീസും നാല് അഗ്നിശനസേനയും ചേർന്ന്​ മണിക്കൂറുകൾക്ക്​ ശേഷമാണ്​ തീയണച്ചത്.

അതെ സമയം ഇന്നലെ പകൽ മഹാരാഷ്​ട്ര അഹമ്മദ്​ നഗറിലെ ജില്ല ആശുപത്രിയിലുണ്ടായ തീപിടിത്തത്തിൽ പത്തുപേർ മരിച്ചിരുന്നു. കോവിഡ്​ ​വാർഡിലാണ്​ ദാരുണ സംഭവം. ഒരാൾക്ക്​ ഗുരുതരമായി പൊള്ളലേറ്റു. സംഭവസമയത്ത്​ 17 പേരാണ്​ ചികിത്സയിലുണ്ടായിരുന്നത്​.

ഇവരെ മറ്റൊരു ആശുപത്രിയിലെ കോവിഡ്​ വാർഡിലേക്ക്​ മാറ്റിയതായി അഹമ്മദ്​നഗർ ജില്ല കലക്​ടർ ഡോ. രാജേരന്ദ ഭോസ്​ലെ അറിയിച്ചു. ഷോർട്ട്​ സർക്യൂട്ട്​ ആണ്​ അപകടകാരണമെന്നാണ്​ പ്രാഥമിക നിഗമനം.

അതേസമയം, അപകടത്തിൽ മരിച്ചവരുടെ കുടുംബത്തിന് അഞ്ചുലക്ഷം രൂപ സർക്കാർ നഷ്ടപരിഹാരം പ്രഖ്യാപിച്ചു. സംഭവത്തിൽ മഹാരാഷ്​ട്ര മുഖ്യമന്ത്രി ഉദ്ദവ് താക്കറെ അന്വേഷണത്തിന് ഉത്തരവിട്ടു. അന്വേഷണം നടത്തി ഒരാഴ്ചക്കകം റിപ്പോർട്ട് സമർപ്പിക്കാൻ ജില്ല കലക്ടർക്ക് നിർദേശം നൽകി.