പ്രമുഖരെ ​ൈലംഗിക കെണിയിൽ കുടുക്കി വിലപേശൽ; മൂന്ന്​ പേർ പിടിയിൽ

മുംബൈ: രാഷ്​ട്രീയക്കാരെയും ഉന്നത ഉദ്യോഗസ്​ഥരെയും ലൈംഗിക കെണിയിൽ കുടുക്കി വിലപേശുന്ന സംഘം പിടിയിൽ. രാജസ്​ഥാൻ, ഹരിയാന, മധ്യപ്രദേശ്​ എന്നിവടങ്ങങ്ങളിൽ നിന്നുള്ള ഒാരോരുത്തരെ വീതം മുംബൈ ക്രൈം ബ്രാഞ്ചാണ്​ അറസ്റ്റ്​​ ചെയ്​തത്​.

ഫേസ്​ബുക്കിലടക്കം വ്യാജ അക്കൗണ്ടുകൾ തുടങ്ങിയാണ്​ സംഘം പ്രവർത്തിച്ചിരുന്നതെന്ന്​ ​ക്രൈംബ്രാഞ്ച്​ അറിയിച്ചു. ഇത്തരം 171 വ്യാജ സാമൂഹിക മാധ്യമ അക്കൗണ്ടുകൾ സംഘത്തിനുണ്ടായിരുന്നു. രാഷ്​ട്രീയ നേതാക്കളുമായും ഉന്നത ഉദ്യോഗസ്​ഥരുമായും വ്യാജ അക്കൗണ്ടുകളിലൂടെ സൗഹൃദം സ്​ഥാപിക്കലാണ്​ ആദ്യഘട്ടം. സ്​ത്രീയാണെന്ന വ്യാജേനയാണ്​ ഇങ്ങനെ സൗഹൃദം സ്​ഥാപിക്കുന്നത്​.

ശേഷം വിഡിയോ കാൾ ചെയ്​ത്​ അശ്ലീല സംഭാഷണങ്ങൾ നടത്തും. നേരത്തെ തയാറാക്കി വെച്ച അശ്ലീല വിഡിയോയാണ്​ സംഘം വിഡിയോ കാളുകൾക്ക്​ ഉപയോഗിച്ചിരുന്നത്​. അശ്ലീല വിഡിയോ കാണുന്ന പ്രമുഖന്‍റെ ഭാവങ്ങളടക്കം സംഘം റെക്കോഡ്​ ചെയ്​ത ശേഷമാണ്​ പിന്നീട്​ വിലപേശൽ നടത്തുന്നത്​.

ആദ്യഘട്ടത്തിൽ 2000 മുതൽ 5000 രൂപ വരെയാണ്​ സംഘം ആവശ്യപ്പെട്ടിരുന്നത്​. മാനക്കേട്​ ഭയന്ന്​ എല്ലാവരും ഈ തുക നൽകി ഭീഷണി അവസാനിപ്പിക്കുകയായിരുന്നുവെന്ന്​ ക്രൈബ്രാഞ്ച്​ പറയുന്നു. ആവശ്യപ്പെടുന്ന തുക പിന്നീട്​ സംഘം ഉയർത്തുകയായിരുന്നു. ലക്ഷങ്ങൾ ഇങ്ങനെ ആവശ്യപ്പെടാൻ തുടങ്ങിയപ്പോഴാണ്​ സംഘത്തെ കുറിച്ച്​ പരാതി ലഭിക്കുന്നതും അന്വേഷണം നടത്തുന്നതും.

നിരവധി പ്രമുഖർ ഇതിനകം സംഘത്തിന്‍റെ തട്ടിപ്പിനിരയായിട്ടുണ്ട്​. കൂടുതൽ പേർ തട്ടിപ്പിലുൾപ്പെട്ടിട്ടുണ്ടോ എന്ന്​ ക്രൈംബ്രാഞ്ച്​ പരിശോധിക്കുന്നുണ്ട്​.