വ്യാപക അക്രമം: മഹാരാഷ്​ട്ര ബന്ദ്​ പിൻവലിച്ചു

മുംബൈ: തൊഴിൽ, വിദ്യാഭ്യാസ സംവരണമാവശ്യപ്പെട്ട്​ മറാത്തകൾ പ്രഖ്യാപിച്ച ബന്ദ്​ പിൻവലിച്ചു. മുംബൈയിൽ വ്യാപകമായി അക്രമണങ്ങളുണ്ടാവുന്ന പശ്​ചാത്തലത്തിലാണ്​ ബന്ദ്​ പിൻവലിച്ചത്​. മറാത്ത ക്രാന്തി മോർച്ചയാണ്​ ബന്ദ്​ പിൻവലിക്കാൻ തീരുമാനിച്ചത്​. സംവരണം ആവശ്യപ്പെട്ടുള്ള പ്രക്ഷോഭങ്ങൾ തുടരുമെന്നും സംഘടന അറിയിച്ചു. അതേ സമയം, സകൽ മറാത്ത സമാജ്​ എന്ന സംഘടനയുടെ നേതൃത്വത്തിൽ നവി മുംബൈ, പൻവേൽ എന്നിവിടങ്ങളിൽ ഇപ്പോഴും പ്രക്ഷോഭങ്ങൾ നടക്കുകയാണെന്ന വാർത്തകളും പുറത്ത്​ വരുന്നുണ്ട്​. 

ഇന്ന്​ സമരക്കാർ ബസുകൾക്ക് നേരെ കല്ലെറിയുകയും റോഡിൽ ടയർ കൂട്ടിയിട്ട് കത്തിക്കുകയും ചെയ്തിരുന്നു. പലയിടങ്ങളിലും കടകൾ ബലമായി അടപ്പിക്കുകയും ചെയ്​തിരുന്നു. മഹാരാഷ്​ട്ര മുഖ്യമന്ത്രി ദേവേന്ദ്ര ഫട്​നാവിസിനെതിരെ മുദ്രാവാക്യം മുഴക്കിയാണ്​ സമരക്കാർ രംഗത്ത്​ വന്നത്​.

സംവരണം ആവശ്യപ്പെട്ട്​ ഒൗറംഗാബാദിലെ കായ്​ഗാവിൽ വഴിതടയുന്നതിനിടെ മറാത്ത യുവാവ്​ കാകാസാഹെബ്​ ഷിണ്ഡെ ഗോദവരി നദിയിൽ ചാടി ആത്​മഹത്യ ചെയ്​തതിൽ പ്രകോപിതരായാണ്​ മറാത്തി ക്രാന്തി മോർച്ച  ബന്ദിന്​ ആഹ്വാനം ചെയ്​തത്​.