അഖിലേഷിനെതിരെ മുലായം തെരഞ്ഞെടുപ്പ്​ കമീഷനിലേക്ക്​

ലഖ്​നോ:  സമാജ്‍വാദി പാര്‍ട്ടി പിളർപ്പിലേക്ക്​ നീങ്ങവെ ഉത്തർ പ്രദേശ്​ മുഖ്യമന്ത്രിയും മകനുമായ അഖിലേഷ്​ യാദവിനെതിരെ മുലായം സിങ് യാദവ്​ ഇന്ന് കേന്ദ്രതിരഞ്ഞെടുപ്പ് കമ്മിഷനില്‍ പരാതി നല്‍കിയേക്കുമെന്ന്​ സൂചന. പാര്‍ട്ടിയുടെ ഔദ്യോഗികവിഭാഗം തങ്ങളാണെന്ന അവകാശവാദമായിരിക്കും മുലായം ഉന്നയിക്കുക. ഇത് സംബന്ധിച്ച് മുലായം സിങ് യാദവും ശിവ്പാല്‍ യാദവും അമര്‍സിങുമായി ചര്‍ച്ച നടത്തുകയും ചെയ്തു.

അതേസമയം പാര്‍ട്ടിയുടെ ചുമതല ഏറ്റെടുത്തതായി അറിയിക്കാനും പാർട്ടി ചിഹ്നം അനുവദിക്കണമെന്നും ആവശ്യമുന്നയിക്കാനും അഖിലേഷും തെരഞ്ഞെടുപ്പ്​ കമീഷനെ കാണുമെന്നാണ്​ റിപ്പോർട്ട്​. കഴിഞ്ഞ ദിവസമാണ്​ എസ്.പിയിൽ നാടകീയ രംഗങ്ങൾ അരങ്ങേറിയത്​.

അഖിലേഷ് പക്ഷത്തെ പ്രമുഖനും സംസ്ഥാന ജനറല്‍ സെക്രട്ടറിയുമായ രാംഗോപാല്‍ യാദവ് ലക്​നോയില്‍ വിളിച്ചുചേര്‍ത്ത ദേശീയ കണ്‍വെന്‍ഷനില്‍ മുലായം സിങ്ങിനെ മാറ്റി മകന്‍ അഖിലേഷ് യാദവിനെ ദേശീയ അധ്യക്ഷനായി പ്രഖ്യാപിക്കുകയായിരുന്നു.

ശിവ്പാല്‍ യാദവിനെ സംസ്ഥാന അധ്യക്ഷസ്ഥാനത്തുനിന്ന് നീക്കുകയും മുലായം ക്യാമ്പിലെ ശക്തനായ അമര്‍ സിങ്ങിനെ പാര്‍ട്ടിയില്‍നിന്ന് പുറത്താക്കുകയും ചെയ്ത അഖിലേഷ്-രാംഗോപാല്‍ സഖ്യം മുലായത്തിന് ശക്തമായ താക്കീതും നല്‍കി.

എന്നാല്‍, ഈ തീരുമാനം തള്ളിക്കളഞ്ഞ മുലായം രാംഗോപാല്‍ യാദവിനെ ആറുവര്‍ഷത്തേക്ക്​ പാർട്ടിയിൽ നിന്ന്​ പുറത്താക്കി. ദേശീയ വൈസ് പ്രസിഡന്‍റ് കിരണ്‍മോയ് നന്ദ, മുതിര്‍ന്ന നേതാവ് നരേഷ് അഗര്‍വാള്‍ എന്നിവരെയും പാര്‍ട്ടിയില്‍നിന്ന് പുറത്താക്കിയതായി പ്രഖ്യാപിച്ചു. ‘ഭരണഘടനവിരുദ്ധ’ കണ്‍വെന്‍ഷനില്‍ പങ്കെടുത്തതിനാണ് നടപടിയെന്നും ദേശീയ കണ്‍വെന്‍ഷന്‍ അസാധുവാണെന്നും വ്യാഴാഴ്ച ദേശീയ കണ്‍വെന്‍ഷന്‍ ചേരുമെന്നും മുലായം അറിയിച്ചു.