എം‌ആർ‌ഐ സ്​കാനിന്​ 50 രൂപ മാത്രം, ഡയാലിസിസ് 600 രൂപക്ക്​; ഏറ്റവും കുറഞ്ഞ നിരക്കിലുള്ള സൗകര്യം ഡൽഹിയിൽ

ന്യൂഡൽഹി: രാജ്യത്തെ വില ഏറ്റവും കുറഞ്ഞ നിരക്കിലുള്ള ഡയഗ്നോസ്റ്റിക്​ സൗകര്യം ഡിസംബറിൽ ഡൽഹിയിലെ ഗുരുദ്വാര ബംഗ്ലാ സാഹിബിൽ പ്രവർത്തനം ആരംഭിക്കും. എം‌ആർ‌ഐക്ക് വെറും 50 രൂപയായിരിക്കും അവിടെ ചാർജ്​ ചെയ്യുകയെന്ന്​ ഡൽഹി ഗുരുദ്വാര മാനേജ്​മെൻറ്​ കമ്മിറ്റി (ഡി.എസ്​.ജി.എം.സി) അറിയിച്ചു. ഗുരുദ്വാര പരിസരത്ത്​ തന്നെയുള്ള ഹർക്രിഷൻ ആശുപത്രിയിൽ ഡയാലിസിസ്​ സെൻററും പ്രവർത്തനം ആരംഭിക്കുന്നുണ്ട്​.

അടുത്ത ആഴ്​ച്ച മുതൽ ചികിത്സ തുടങ്ങുമെന്നും ഡയാലിസിസ്​ പ്രക്രിയക്ക്​ 600 രൂപ മാത്രമായിരിക്കും ഇൗടാക്കുകയെന്നും ഡി.എസ്​.ജി.എം.സി പ്രസിഡൻറ്​ മഞ്ജിന്ദർ സിങ് സിർസ​ പറഞ്ഞു. ആറ്​ കോടി രൂപ വില വരുന്ന ഡയഗ്നോസ്റ്റിക്​ ഉപകരണങ്ങൾ ആശുപത്രിക്ക്​ കൈമാറിയിട്ടുണ്ട്​. അതിൽ, നാല്​ ഡയാലിസിസ്​ ഉപകരണങ്ങൾ, അൾട്രാസൗണ്ടിനുള്ള ഒരു മെഷീൻ, എക്​സ്​-റേ, എം.ആർ.​​െഎ എന്നിവക്കുള്ള ഉപകരണങ്ങൾ എന്നിവയാണുള്ളത്​.

പാവപ്പെട്ടവർക്ക്​ എം.ആർ.​​െഎ സ്​കാൻ 50 രൂപക്കും അല്ലാത്തവർക്ക്​ 800 രൂപക്കുമായിരിക്കും ചെയ്​തു കൊടുക്കുക. എക്​സ്​-റേക്കും അൾട്രാ സൗണ്ടിനും 150 രൂപയാണ്​ ഇൗടാക്കുക. ആർക്കൊക്കെയാണ്​ ഇളവ്​ വരുത്തേണ്ടത്​ എന്ന കാര്യത്തിൽ തീരുമാനമെടുക്കാനായി ഒരു ഡോക്​ടർമാരുടെ കമ്മിറ്റി രൂപീകരിച്ചതായും സിർസ്​ പറഞ്ഞു. സ്വകാര്യ ലബോറട്ടറികളിൽ ഒരു എം.ആർ.​​െഎക്ക്​ 2500 രൂപ മുതലാണ്​ ഇൗടാക്കുന്നത്​.