രാഹുലി​െൻറ പ്രസംഗം ’ത്രീ ഇഡിയറ്റ്സിലെ’​ കഥാപാത്രത്തെ പോലെയെന്ന്​ മധ്യപ്രദേശ്​ മന്ത്രി

ഭോപാൽ: കോൺഗ്രസ്​ അധ്യക്ഷൻ രാഹുൽ ഗാന്ധിയുടെ പ്രസംഗത്തെ പരിഹസിച്ച്​  മധ്യപ്ര​േദശ്​ മന്ത്രി രംഗത്ത്​. രാഹുലി​​​െൻറ പ്രസംഗം ബോളിവുഡ്​ ചിത്രമായ  ’ത്രീ ഇഡിയറ്റ്സിലെ’​ രംഗം പോലെയാണെന്ന്​ സഹകരണവകുപ്പ്​​ മന്ത്രി വിശ്വാസ്​ സാരംഗ് പറഞ്ഞു​. ചിത്രത്തിൽ ചതുർ രാമലിംഗം എന്ന കഥാപാത്രം നടത്തുന്ന രസകരമായ പ്രസംഗത്തിൽ നിന്ന്​ പ്രചോദനമുൾക്കൊണ്ടുള്ളതായിര​ുന്നു രാഹുൽ ഗാന്ധിയുടെ മന്ദ്​സൗർ പ്രസംഗമെന്നും ​ അദ്ദേഹം കുറ്റപ്പെടുത്തി.

ചിത്രത്തിലേതു പോലെ രാഹുൽ ഗാന്ധി മറ്റാരോ എഴുതി നൽകിയ പ്രസംഗം വായിക്കുകയായിരുന്നു. കൃത്യമായ തിരക്കഥയൊരുക്കിയുള്ള അപക്വമായതും നാടകീയവുമായ പ്രസംഗമായിര​ുന്നു അത്​. വസ്​തുതകളോ യാഥാർഥ്യമോ അതിൽ ഇല്ലായിരുന്നുവെന്നും അദ്ദേഹം ആരോപിച്ചു. 

ഭക്ഷ്യ സംസ്​കരണ യൂനിറ്റ്​ ആരംഭിക്കുന്നതിനെ കുറിച്ചും രാഹുൽ സംസാരിച്ചിരുന്നു. എന്നാൽ ഒരാഴ​്​ച മുമ്പാണ്​ മുഖ്യമന്ത്രി ശിവരാജ്​ ചൗഹാൻ ഇതേകുറിച്ചു പറഞ്ഞത്​. ഭക്ഷ്യ ശൃംഖലയെ കുറിച്ചല്ല, തട്ടിപ്പ്​ ശൃംഖലയെ കുറിച്ചാണ്​ രാഹുൽ യഥാർഥത്തിൽ പറയേണ്ടത്. ഇതിൽ റോബർട്ട്​ വദ്രയാകും പ്രധാന കഥാപാത്രം​. കോൺഗ്രസ്​ പ്രസിഡൻറ്​ കർഷക മരണത്തിൽ രാഷ്​ട്രീയം കളിക്കുകയാണെന്നും മന്ത്രി കൂട്ടിച്ചേർത്തു. 

മന്ദ്​സൗറിൽ കഴിഞ്ഞ ദിവസം നടന്ന കർഷക റാലിയിൽ സംസാരിക്കവെ, കോൺഗ്രസ്​ മധ്യപ്രദേശിൽ അധി​കാരത്തിൽ വന്നാൽ 
10 ദിവസത്തിനുള്ളിൽ കാർഷിക കടങ്ങൾ എഴുതിത്തള്ളുമെന്ന് രാഹുൽ​ പറഞ്ഞിരുന്നു. 

‘ത്രീ ഇഡിയറ്റ്​സ്’​ എന്ന ചിത്രത്തിൽ ഒമി വൈദ്യ അവതരിപ്പിച്ച ചതുർ രാമലിംഗം എന്ന കഥാപാത്രത്തിന്​ ഹിന്ദി വ്യക്തമായി അറിയില്ല. എന്നാൽ അയാളുടെ ഹിന്ദി പ്രസംഗത്തിൽ ആമിർഖാൻ അവതരിപ്പിച്ച റാഞ്ചോ എന്ന കഥാപാത്രം ചില തിരുത്തലുകൾ വരുത്തുന്നു.  ഇതറിയാതെ രാമലിംഗം ആ പ്രസംഗം വായിക്കുന്നതും അത്​ പൊട്ടിച്ചിരിക്കു വക നൽകുന്നതുമാണ്​ ചിത്രത്തിലെ രംഗം.