ലോക്​ഡൗണിൽ വിതരണം ചെയ്​തത്​ 22,000ത്തിലധികം ഭക്ഷണപൊതികൾ; മനസും വയറും നിറക്കുകയാണ്​ ഈ അമ്മയും മകനും

മുംബൈ: മഹാനഗരത്തിൽ കോവിഡ്​ താണ്ഡവമാടു​േമ്പാൾ ഹൃദയം കവരുകയാണ്​ ഒരു അമ്മയും മകനും. മഹാമാരിക്കാലത്ത്​ വിശക്കുന്നവന്​​ ത​ങ്ങളുടെ റസ്റ്ററന്‍റ്​ അടുക്കള വഴി ഭക്ഷണം നൽകുകയാണ്​ ഇരുവരും. ഹീന മാണ്ഡവ്യയും മകൻ ഹർഷ്​നെയും മുംബൈക്കാർക്ക്​ ഇപ്പോൾ സുപരിചിതം.

കോവിഡ് ആദ്യ വ്യാപനത്തിൽ പ്രഖ്യാപിച്ച ലോക്​ഡൗണിലാണ്​ ഇരുവരും തങ്ങളുടെ കൊച്ചു അടുക്കള വിശക്കുന്നവർക്കായി തുറന്നത്​. രണ്ടാം വ്യാപനത്തിലും തുടർന്നു. സുമനസ്​കരായ വോളണ്ടിയർമാരെയും ഒപ്പംകൂട്ടി. അമ്മയും മകനും ​വോളണ്ടിയർമാരും ചേർന്ന്​ പണം സമാഹരിച്ചാണ്​ ഭക്ഷണത്തിനുള്ള തുക കണ്ടെത്തുന്നത്​.

പ്രതിദിനം 100 മുതൽ 150 പേർക്ക്​ ഇവർ വയറും മനസും നിറച്ച്​ ഭക്ഷണം നൽകും. ലോക്​ഡൗൺ കാലത്ത്​ 22,000 ഊണും 55,000 റൊട്ടിയും 6000 വീട്ടിലുണ്ടായ മധുരപലഹാരങ്ങളും വിതരണം ചെയ്യാൻ കഴിഞ്ഞതായി ഹർഷ്​ പ്രമുഖ സാമൂഹിക മാധ്യമ പേജായ ഹ്യൂമൻസ്​ ​ഓഫ്​ ബോംബെയോട്​ പറഞ്ഞു.

2020ലെ ആദ്യ ലോക്​ഡൗണിൽ ഒരു ഉപഭോക്താവ്​ ഇവരുടെ റസ്റ്ററന്‍റുമായി ബന്ധപ്പെടുകയും 100 പേർക്ക്​ ഭക്ഷണം തയാറാക്കാമോ എന്ന്​ ആവശ്യപ്പെടുകയുമായിരുന്നു. 'ആദ്യം തങ്ങളുടെ സുരക്ഷയെ ആലോചിച്ച്​ ആശങ്കയുണ്ടായിരുന്നു. പ​ക്ഷേ പിന്നീട്​ ഞങ്ങൾ ചിന്തിച്ചു, മറ്റുള്ളവരെ സഹായിക്കണം' - ഹർഷ്​​ പറഞ്ഞു.

ലോകമെമ്പാടുമുള്ള ജനങ്ങൾ നൽകിയ സംഭാവനകൾ ഉപയോഗിച്ചാണ്​ ദിവസവും എല്ലാവർക്കും ഭക്ഷണം നൽകാൻ സാധിക്കുന്നതെന്നും ഹർഷ്​ കൂട്ടിച്ചേർത്തു.

ലോക്ഡൗണിന്‍റെ സമയങ്ങളിൽ ഞങ്ങൾ ഭക്ഷണ വിതരണത്തിൽനിന്ന്​ പണം സമ്പാദിച്ചിട്ടില്ല. രണ്ടാം തരംഗം പിടിച്ചുല​ച്ചപ്പോൾ ഞങ്ങൾ വീണ്ടും ഭക്ഷണവിതരണത്തിനായി സംഭാവനകൾ ക്ഷണിച്ചു. രണ്ടു ദിവസത്തിനുള്ളിൽ 1.5ലക്ഷം സംഭാവനയായി ലഭിച്ചുവെന്നും അവർ പറഞ്ഞു.

അഞ്ചാംവയസിൽ പിതാവിനെ നഷ്​ടമായതാണ്​ ഹർഷിന്​. തുടർന്ന്​ ഹീന വീട്ടിൽ ഭക്ഷണം പാചകം ചെയ്​ത്​ ടിഫിൻ സർവിസ്​ ആരംഭിക്കുകയായിരുന്നു. ആവശ്യക്കാർക്ക്​ വീടുകളിൽ ഭക്ഷണം എത്തിച്ചുനൽകും. 'ടിഫിൻ സർവിസിന്‍റെ ആദ്യ ഓർഡർ തൊട്ടടുത്ത വീട്ടി​ലെ ആന്‍റിയുടേതായിരുന്നു. 35രൂപ ലഭിച്ചു. അതായിരുന്നു അമ്മയുടെ ആദ്യ വരുമാനം' -ഹർഷ്​ പറഞ്ഞു.

മെച്ചപ്പെട്ട വിദ്യാഭ്യാസം മകന്​ നൽകാനായി ഒരു അന്താരാഷ്​ട്ര സ്​കൂളിൽ മകനെ പഠിപ്പിക്കണമെന്നായിരുന്നു ഹീനയുടെ ആഗ്രഹം. എന്നാൽ സാമ്പത്തികം അവിടെ വില്ലനായി. ഹീനയുടെ ബുദ്ധിമുട്ടുകളെക്കുറിച്ച്​ അറിഞ്ഞ സ്​കൂൾ ഡയറക്​ടർ ഹർഷയുടെ സ്​കൂൾ ഫീസ്​ ഒഴിവാക്കുകയായിരുന്നു.

കുറച്ചുവർഷങ്ങൾക്ക്​ ശേഷം, ഹീനയെ ഒരു അപരിചിതൻ ഒരു കടമുറി വാടകക്ക്​ എടുക്കാനും ഒരു സാമൂഹിക അടുക്കള നിർമിക്കാനും പണം നൽകി സഹായിച്ചു. ഇതോടെ 2003ൽ 'ഹർഷ്​ താലി ആൻഡ്​ പറാത്താസ്​' പ്രവർത്തനം ആരംഭിച്ചു. പഠനം പൂർത്തിയാക്കിയ ഹർഷ്​ അമ്മയെ ബിസിനസിൽ സഹായിക്കാൻ ഇറങ്ങുകയായിരുന്നു. തുടർന്ന്​ അതിലൂടെ ലഭിച്ച വരുമാനത്തില​ൂടെ ബിസിനസ്​ തുടങ്ങാൻ സഹായിച്ചയാൾക്കും സ്​കൂൾ ഡയറക്​ടർക്കും പണം തിരിച്ചുനൽകാൻ ചെന്ന​ു. എന്നാൽ ഇരുവരും പണം വാങ്ങാൻ തയാറായില്ല, ആ പണം ഉപയോഗിച്ചാണ്​ മഹാമാരിക്കാലത്ത്​ ഇരുവരും പാവങ്ങൾക്ക്​ സൗജന്യ ഭക്ഷണം നൽകാൻ ആരംഭിച്ചതെന്നും ഹർഷ്​ പറയുന്നു.

അപരിചതർക്കായി സമയവും പണവും ചിലവാക്കുന്നതിനെ പലരും വിമർശിച്ചിരുന്നു​. എന്നാൽ അപരിചിതർ ഇല്ലായിരുന്നുവെങ്കിൽ തങ്ങൾക്ക്​ മറ്റുള്ളവരെ സഹായിക്കാൻ കഴിയുമായിരുന്നില്ലെന്ന്​ ഹർഷ്​ പറയുന്നു.