'ഗോമൂത്രവും ബ്ലാക്​ ഫംഗസും തമ്മിൽ ബന്ധം'; ബി.ബി.സി റിപ്പോർട്ട്​ എന്ന പേരിൽ വ്യാജ പ്രചാരണം

ന്യൂഡൽഹി: അടുത്തിടെ ബി.ബി.സി പ്രസിദ്ധീകരിച്ചതെന്ന പേരിൽ, പുതിയ ഭീഷണിയായ ബ്ലാക്​ ഫംഗസിനെ ഗോമൂത്രവുമായി ചേർത്ത്​ പ്രചരിക്കുന്നത്​ വ്യാജ വാർത്ത. ഇന്ത്യയിലെ ലേഖകൻ സൗതിക്​ ബിശ്വാസ്​ എഴുതിയതെന്ന പേരിലാണ്​ വ്യാപകമായി വ്യാജ വാർത്ത പ്രചരിപ്പിക്കുന്നത്​. ജീവൻരക്ഷാ ഔഷധമായ സ്​റ്റിറോയ്​ഡുകൾ കോവിഡ്​ ബാധിച്ച്​ ഗുരുതരാവസ്​ഥയിൽ കഴിയുന്ന രോഗികൾക്ക്​ നൽകുന്നത്​ ബ്ലാക്​ ഫംഗസ്​ വിളിച്ചുവരുത്തുകയാണെന്ന്​ വ്യാജവാർത്ത പറയുന്നു. ഗോമൂത്രവും ബ്ലാക്​ ഫംഗസും തമ്മിൽ ബന്ധിപ്പിക്കുന്ന 9,000 സംഭവങ്ങൾ കണ്ടെത്തിയെന്നാണ്​ മറ്റൊരു ആരോപണം. കോവിഡിന്​ ഗോമൂ​ത്രവും ചാണകവും മരുന്നാണെന്ന വ്യാപക പ്രചാരണം ഉത്തരേന്ത്യയിൽ നിരവധി പേരെ ഇതിലേക്ക്​ ആകർഷിച്ചിരുന്നു. അലോപതി കൊലപാതകിയ​ാണെന്ന യോഗഗുരു രാംദേവി​െൻറ പരാമർശത്തിനെതിരെ ഡോക്​ടർമാരുടെ സംഘടന 1,000 കോടിയുടെ നഷ്​ടപരിഹാര കേസ്​ നൽകിയതും അടുത്തിടെ. ഇതിനു പിറകെയാണ്​ ബ്ലാക്​ ഫംഗസിനെയും ഗോമൂത്രത്തെയും ബന്ധിപ്പിച്ച്​ വ്യാജ വാർത്ത പ്രചരിപ്പിക്കുന്നത്​.

ലേഖകനെന്നു പരിചയപ്പെടുത്തിയ സൗതിക്​ ബിശ്വാസ്​ ഇത്​ നിഷേധിച്ചു. വാർത്തകൾ ബി.ബി.സിയുടെ ഔദ്യോഗിക പേജിൽ പരിശോധിക്കാനും അദ്ദേഹം ആവശ്യപ്പെട്ടു.

ഇന്ത്യൻ പശുവി​െൻറ മൂത്രം സ്​ഥിരമായി കുടിച്ചതിനാലാണ്​ താൻ കോവിഡിൽനിന്ന്​ രക്ഷപ്പെട്ടതെന്ന്​ നേരത്തെ ബി.ജെ.പി ഭോപാൽ എം.പി പ്രഗ്യാ സിങ്​ താക്കൂർ അവകാശപ്പെട്ടിരുന്നു.