മംഗളൂരുവിൽനിന്ന് കൂടുതൽ വേനൽ വിമാന സർവീസുകൾ

മംഗളൂരു: ഈമാസം 30 മുതൽ പ്രാബല്യത്തിൽ വരുന്ന വേനൽക്കാല ഷെഡ്യൂൾ 2025ന്‍റെ ഭാഗമായി ബംഗളൂരുവിലേക്കും മറ്റ് പ്രധാന ആഭ്യന്തര, അന്തർദേശീയ ലക്ഷ്യസ്ഥാനങ്ങളിലേക്കുമുള്ള വിമാന സർവീസുകൾ വർധിപ്പിക്കാൻ മംഗളൂരു രാജ്യാന്തര വിമാനത്താവളം ഒരുങ്ങുന്നു. യാത്രക്കാർക്ക് വർധിച്ച യാത്രാ ഓപ്ഷനുകളും തടസ്സമില്ലാത്ത കണക്റ്റിവിറ്റിയും നൽകുക എന്നതാണ് വിപുലീകരിച്ച ഷെഡ്യൂൾ ലക്ഷ്യമിടുന്നത്.

മംഗളൂരുവിനും ബംഗളൂരുവിനുമിടയിൽ നിലവിലുള്ള ഏഴ് പ്രതിദിന വിമാനങ്ങളിൽനിന്ന് സർവീസുകളുടെ എണ്ണം എട്ടായി ഉയരും. ഇൻഡിഗോ ആറ് വിമാനങ്ങൾ സർവീസ് നടത്തും. എയർ ഇന്ത്യ എക്സ്പ്രസ് രണ്ട് വിമാനങ്ങൾ സർവീസ് നടത്തും. മെയ് 23 മുതൽ ഇൻഡിഗോയുടെ മറ്റൊരു വിമാനം കൂടി സർവീസ് ആരംഭിക്കും. ഇതോടെ ഈ റൂട്ടിലെ ആകെ പ്രതിദിന വിമാനങ്ങളുടെ എണ്ണം ഒമ്പതായി ഉയരും.

മംഗളൂരു-മുംബൈ സെക്ടറിൽ അഞ്ച് പ്രതിദിന വിമാന സർവീസുകൾ തുടരും - മൂന്ന് ഇൻഡിഗോയും രണ്ട് എയർ ഇന്ത്യ എക്സ്പ്രസും. ഡൽഹിയിലേക്കുള്ള വിമാന സർവീസുകൾ ഇൻഡിഗോയും എയർ ഇന്ത്യ എക്സ്പ്രസും പ്രതിദിനം ഒന്ന് എന്ന നിരക്കിൽ തുടരും. ഹൈദരാബാദിൽനിന്ന് ആഴ്ചയിൽ മൂന്ന് ദിവസങ്ങളിൽ ഒരു അധിക വിമാനം സർവീസ് നടത്തും. എല്ലാം ഇൻഡിഗോയാണ് നടത്തുന്നത്. ചെന്നൈയിൽനിന്ന് രണ്ട് പ്രതിദിന വിമാന സർവീസുകൾ തുടരും. കൂടാതെ ഇൻഡിഗോയും സർവീസ് നടത്തുന്നു.

അന്താരാഷ്ട്ര തലത്തിൽ എയർ ഇന്ത്യ എക്സ്പ്രസ് ഇനി ബഹ്‌റൈനിലേക്കുള്ള രണ്ട് പ്രതിവാര വിമാനങ്ങളും കണ്ണൂർ വഴി സർവീസ് നടത്തുന്നതിനു പകരം മംഗളൂരുവിൽനിന്ന് നേരിട്ട് സർവീസ് നടത്തും. ദുബൈയിലേക്ക് രണ്ട് പ്രതിദിന വിമാനങ്ങളും അബൂദബിയിലേക്ക് ഒരു പ്രതിദിന വിമാനവും ദമ്മാമിലേക്കും മസ്‌കത്തിലേക്കും നാല് പ്രതിവാര വിമാനങ്ങളും എയർലൈൻ തുടരും. ദോഹയിലേക്ക് രണ്ട് ആഴ്ചയും ജിദ്ദയിലേക്കും കുവൈത്തിലേക്കും ഓരോ വിമാനവും ഉണ്ടാകും.

സീറ്റ് ലഭ്യത വർധിപ്പിക്കുന്നതിനായി ഇൻഡിഗോ അബൂദബി റൂട്ടിൽ 232 സീറ്റുള്ള എയർബസ് എ-321 നിയോ എന്ന വലിയ വിമാനം അവതരിപ്പിക്കും. ദുബായിലേക്കുള്ള ആഴ്ചയിലെ നാല് വിമാന സർവീസുകളും എയർലൈൻ തുടരും.