സന്യാസിക്ക്​ സ്വീകരണമൊരുക്കാൻ ജനം ലോക്​ഡൗൺ ലംഘിച്ച്​ നിരത്തിൽ

ബന്ദ: രാജ്യത്ത്​ കോവിഡ്​ ബാധിതരുടെ എണ്ണം വർധിക്കുന്ന സാഹചര്യത്തിൽ സാമൂഹിക അകലം പാലിക്കാതെ ജൈന സന്യാസിക്ക്​ സ്വീകരണമൊരുക്കാൻ മധ്യപ്രദേശിൽ ഒത്തുകൂടിയത്​ നൂറുകണക്കിനാളുകൾ. മഹാമാരി ഏറ്റവും കൂടുതൽ ബാധിച്ച സംസ്​ഥാനങ്ങളിലൊന്നായ മധ്യപ്രദേശിലെ സാഗർ ജില്ലയിലാണ്​ സംഭവം. സന്യാസിയായ മുനി പ്രണാംസാഗറി​നെയും പരിവാരങ്ങളെയും സ്വീകരിക്കാനായി​ ആയിരക്കണക്കിനാളുകൾ ബന്ദയിൽ കഴിഞ്ഞ ദിവസം ഒത്തുകൂടിയ​ ദൃശ്യങ്ങൾ വാർത്ത ഏജൻസിയാണ്​  പുറത്തുവിട്ടത്​. ​മാസ്​ക്​ പോലും ധരിക്കാതെയാണ്​ ആളുകൾ കൂട്ടത്തോടെ പുറത്തിറങ്ങിയത്​. 

ജില്ല ആസ്​ഥാനത്ത്​ നിന്നും 35 കിലോമീറ്റർ അകലെയാണ്​ ബാന്ദ പട്ടണം. സന്യാസിയും അനുയായികളും പട്ടണത്തിലെത്തിയപ്പോൾ ആളുകൾ ലോക്​ഡൗൺ നിയമങ്ങൾ കാറ്റിൽപറത്തി റോഡിലേക്കിറങ്ങുകയായിരുന്നു. 

സംഭവത്തിൽ അന്വേഷണം നടത്തി സാമൂഹിക അകലം പാലിക്കാത്തതിനും കൂട്ടംകൂടിയതിനും സംഘാടകർക്കെതിരെ കേസെടുത്ത്​ നടപടി സ്വീകരിക്കാൻ നിർദേശം നൽകിയതായി​ സാഗർ അഡീഷനൽ പൊലീസ്​ സുപ്രണ്ട് പ്രവീൺ ഭൂരിയ പറഞ്ഞു. 400 മുതൽ 500 വരെ ആളുകൾക്കെതിരെ കേസ്​ രജിസ്​റ്റർ ചെയ്യാൻ പോകുകയാണെന്ന്​ ബാന്ദ പൊലീസ്​ സ്​റ്റേഷൻ അധികൃതർ അറിയിച്ചു. 

സാഗർ ജില്ലയിൽ ഇതുവരെ 10 കോവിഡ്​ കേസുകൾ റിപ്പോർട്ട്​ ചെയ്യുകയും ഒരാൾ മരിക്കുകയും ​െചയ്​തിരുന്നു. ലോക്​ഡൗണിൽ ഇളവുകൾ വരുത്തുന്നത്​ സംബന്ധിച്ച്​ തീരുമാനമെടുക്കാൻ കഴിഞ്ഞ ദിവസം മുഖ്യമന്ത്രി ശിവരാജ്​ സിങ്​ ചൗഹാൻ ജനങ്ങളിൽ നിന്ന്​ നിർദേശങ്ങൾ തേടിയിരുന്നു.