മോദി ദുർബലനായ പ്രധാനമന്ത്രി -രാഹ​ുൽ

ന്യൂഡൽഹി: യു.എസ്​ സന്ദർശനത്തിൽ എച്ച്​1ബി വിസ വിഷയം ഉന്നയിക്കുന്നതിൽ പരാജയപ്പെട്ട നരേന്ദ്ര മോദി ദുർബലനായ പ്രധാനമന്ത്രിയാണെന്ന്​ കോൺഗ്രസ്​ ഉപാധ്യക്ഷൻ രാഹുൽ ഗാന്ധി. ഇന്ത്യൻ സാ​േങ്കതിക വിദഗ്​ധർക്ക്​ ഏറെ തൊഴിൽസാധ്യത തുറക്കുന്ന എച്ച്​1ബി വിസ അനുവദിക്കുന്നതിൽ പ്രസിഡൻറ്​ ഡോണൾഡ്​ ട്രംപ്​ കടുത്ത നിയന്ത്രണങ്ങൾ കൊണ്ടുവന്നിരുന്നു. യു.എസ്​ സന്ദർശന വേളയിൽ മോദി ഇക്കാര്യത്തിൽ അനുകൂല തീരുമാനത്തിന്​ ശ്രമിക്കുമെന്നാണ്​ ഏവരും കരുതിയത്​. എന്നാൽ, വിഷയത്തിൽ പ്രധാനമന്ത്രി നിശ്ശബ്​ദത പാലിക്കുകയാണുണ്ടായതെന്ന്​ രാഹുലി​​​െൻറ ഒാഫിസ്​ ട്വിറ്റർ സന്ദേശത്തിൽ കുറ്റപ്പെടുത്തി. 

ഹിസ്​ബുൽ മുജാഹിദീൻ കമാൻഡർ സയ്യിദ്​ സ്വലാഹുദ്ദീനെ ആഗോള ഭീകരനായി പ്രഖ്യാപിച്ച വേളയിൽ യു.എസ്​ അധികൃതർ കശ്​മീരിന്​ നൽകിയ തെറ്റായ വിശേഷണത്തോട്​ വിദേശ മന്ത്രാലയം പ്രതികരിക്കാത്തതിനെയും അദ്ദേഹം വിമർശിച്ചു. ‘ഇന്ത്യൻ അധീനതയിലുള്ള ജമ്മു ആൻഡ്​ കശ്​മീർ’ എന്നായിരുന്നു ആ വിശേഷണമെന്ന്​ പത്രങ്ങൾ റിപ്പോർട്ട്​ ചെയ്​തതായും കുറിപ്പിലുണ്ട്​.