ജനതാദൾ-യുവും എ.​െഎ.എ.ഡി.എം.കെയും മന്ത്രിസഭയിലുണ്ടാകില്ല

ന്യൂഡൽഹി: ബി.ജെ.പി സഖ്യകക്ഷികളായി മാറിയ ജനതാദൾ^യു, എ.​െഎ.എ.ഡി.എം.കെ എന്നിവക്ക്​ ഞായറാഴ്​ച നടക്കുന്ന കേന്ദ്രമന്ത്രിസഭ വികസനത്തിൽ പ്രാതിനിധ്യമില്ല.  ഒമ്പതു പുതുമുഖങ്ങളുടെ പേരുവിവരം സർക്കാർവൃത്തങ്ങൾ പുറത്തുവിട്ടതിൽ ഇൗ കക്ഷികളുടെ പ്രതിനിധികൾ ആരുമില്ല.  ഇതേക്കുറിച്ച്​ ബി.ജെ.പി നേതാക്കൾ മൗനംപാലിക്കുകയാണ്​. സഖ്യകക്ഷികൾക്ക്​ സീറ്റു പങ്കിടുന്ന കാര്യത്തിൽ ഫോർമുലയുണ്ടാക്കാൻ കഴിയാത്തതാണ്​ കാരണമെന്നാണ്​ സൂചന.

ജനതാദൾ-യുവിന്​ കേന്ദ്രമന്ത്രിസഭയിൽ ഇടംകിട്ടുന്നുവെന്ന വിധത്തിലാണ്​ ഇന്നലെ പകൽ ചർച്ചകൾ പുരോഗമിച്ചത്​. എന്നാൽ, കൂടിയാലോചനകളൊന്നും നടന്നിട്ടില്ലെന്നാണ്​ വൈകീട്ട്​ പാർട്ടി നേതാവും ബിഹാർ മുഖ്യമ​ന്ത്രിയുമായ നിതീഷ്​ കുമാർ പറഞ്ഞത്​. ശിവ​േസന കൂടുതൽ സീറ്റിന്​ അവകാശവാദമുന്നയിച്ചതാണ്​ പ്രശ്​നകാരണമെന്നു പറയുന്നു.

അതിന്​ വഴങ്ങാൻ ബി.ജെ.പി തയാറായില്ല. ജനതാദൾ-യു അതിനൊടുവിൽ മന്ത്രിസഭയിലേക്ക്​ ഇല്ലെന്ന തീരുമാനത്തോടെ പിന്മാറുകയും ചെയ്​തു. ആഭ്യന്തര പ്രശ്​നങ്ങളിൽ തട്ടിയാണ്​ എ.​െഎ.എ.ഡി.എം.കെയുടെ പിന്മാറ്റം. ടി.ടി.വി. ദിനകര​​െൻറ നേതൃത്വത്തിലുള്ള വിഭാഗം ഇടഞ്ഞു നിൽക്കുകയാണ്​.