രണ്ടാം മോദി സർക്കാറിന്​ ഇന്ന്​ ഒരുവയസ്​; ആഘോഷം ഡിജിറ്റൽ

ന്യൂഡൽഹി: പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള രണ്ടാം ദേശീയ ജനാധിപത്യ സഖ്യ (എൻ.ഡി.എ) സർക്കാറിന്​ ശനിയാഴ്​ച ഒരുവയസ്​ തികഞ്ഞു. കോവിഡ്​ വ്യാപനത്തിൻെറ പശ്ചാത്തലത്തിൽ ആഘോഷങ്ങൾ ഓൺലൈനായി നടത്താനാണ് ബി.ജെ.പി തീരുമാനം. സർക്കാറിൻെറ ഭരണനേട്ടങ്ങൾ ജനങ്ങളിലേക്കെത്തിക്കാൻ ഒരുമാസം നീണ്ടുനിൽക്കുന്ന പ്രചാരണ പരിപാടികൾക്കും ഇന്ന്​ തുടക്കമാകും. 

ഒന്നാം വാർഷികമായ ഇന്ന് 1000 ഓൺലൈൻ സമ്മേളനങ്ങൾ സംഘടിപ്പിക്കും. രാജ്യവ്യാപകമായി 500 ഓൺലൈൻ റാലികളും വെർച്വൽ സമ്മേളനങ്ങളും നടത്തും.  വൈകീട്ട്​ നാലിന്​ ദേശീയ അധ്യക്ഷൻ ജെ.പി. നഡ്ഡ ഫേസ്​ബുക്ക്​ ലൈവിലൂടെ പാർട്ടിപ്രവർത്തകരെ അഭിസംബോധന ചെയ്യും. സർക്കാരിന്‍റെ നേട്ടങ്ങൾ ഉയർത്തി കാട്ടാൻ കേന്ദ്ര മന്ത്രിമാരുടെ അഭിമുഖങ്ങളും വിഡിയോയും  ശനിയാഴ്​ച പുറത്തിറക്കും. സ്വാശ്രയ ഇന്ത്യ പദ്ധതി വിവരിക്കുന്ന പ്രധാനമന്ത്രിയുടെ കത്ത്​ രാജ്യത്തെ പത്തു കോടി കുടുംബങ്ങൾക്കിടയിൽ വിതരണം ചെയ്യും.  

2014ന് സമാനമായി മൃഗീയ ഭൂരിപക്ഷത്തോടെയാണ് എൻ.ഡി.എ 2019 മെയ്​ 30ന്​ സത്യപ്രതിജ്ഞ ചെയ്​ത്​ അധികാരമേറിയത്​. ബി.ജെ.പി ഒറ്റക്ക്​ കേവല ഭൂരിപക്ഷം നേടി. 545 ലോക്​സഭ സീറ്റുകളിലേക്ക്​ നടന്ന തെരഞ്ഞെടുപ്പിൽ 303 സീറ്റുകളാണ്​ ബി.ജെ.പിക്ക്​ മാത്രം കിട്ടിയത്​. ഘടകകക്ഷികളുടെ സീറ്റുകളും ചേർത്താൽ അത് 353 ആകും.

അധികാരത്തിൽ വന്ന ശേഷം മുത്തലാഖ്, കശ്മീരിൻെറ  പ്രത്യേക പദവി നൽകുന്ന ആർട്ടിക്ക്​ൾ 370 റദ്ദാക്കൽ, പൗരത്വ ഭേദഗതി നിയമം, ആ​േയാധ്യയിലെ രാമക്ഷേത്ര നിർമാണം തുടങ്ങി ബി.ജെ.പി.യുടെ പ്രഖ്യാപിത നിലപടുകൾ നിയമപരമായി നടപ്പിലാക്കി എടുക്കാനാണ് മോദി സർക്കാർ ശ്രമിച്ചത്. ഇതോടൊപ്പം സാമ്പത്തിക പ്രതിസന്ധി, പൗരത്വ ഭേദഗതി നിയമത്തിനെതിരായ പ്രക്ഷോഭങ്ങൾ, 53 പേരുടെ ജീവൻ നഷ്​ടപ്പെടാൻ ഇടയാക്കിയ ഡൽഹി കലാപം എന്നിവ സർക്കാറിൻെറ തലവേദനയായി. കടുത്ത സാമ്പത്തിക പ്രതിസന്ധി​​ക്കൊപ്പം അതിവേഗം പടർന്ന്​ കൊണ്ടിരിക്കു​ന്ന കോറോണ വൈറസിനെ എങ്ങനെ പിടിച്ചുകെട്ടുമെന്നതുമാണ്​ സർക്കാറിന്​ മുന്നിലുള്ള പ്രധാന വെല്ലുവിളി​.