മോദി-അമിത്​ ഷാമാർ ജനങ്ങളോട്​ യുദ്ധം പ്രഖ്യാപിച്ചവർ -സോണിയ

ന്യൂഡൽഹി: വിഭാഗീയതയും അക്രമവും സൃഷ്​ടിച്ച്​ സ്വന്തം ജനതയോട്​ യുദ്ധം പ്രഖ്യാപിച്ച ​നേതാക്കളാണ്​ പ്രധാനമന്ത്രി നരേന്ദ്ര മോദിയും ആഭ്യന്തര മന്ത്രി അമിത് ​ഷായുമെന്ന്​ കോൺഗ്രസ്​ അധ്യക്ഷ സോണിയ ഗാന്ധി. രാഷ്​ട്രീയ താൽപര്യങ്ങൾക്കായി സാമുദായിക സംഘർഷവും അസ്​ഥിരതയും പരത്തുകയാണ്​ ബി.ജെ.പി സർക്കാറെന്ന്​ സോണിയ പ്രസ്​താവനയിൽ കുറ്റപ്പെടുത്തി.

സമാധാനം, സൗഹാർദം, ഭരണഘടന സംരക്ഷണം, മെച്ചപ്പെട്ട ഭരണം എന്നിവ ഒരു സർക്കാറി​​െൻറ ഉത്തരവാദിത്തമാണ്​. എന്നാൽ, സ്വജനങ്ങളെ വിദ്വേഷ മനോഭാവത്തിലേക്ക്​ തള്ളിവിടുകയും യുവാക്കളുടെ ഭാവി അനിശ്ചിതത്തിലാക്കുകയുമാണ്​ ചെയ്യുന്നത്​.

അസമും ത്രിപുരയും മേഘാലയവും കത്തുകയാണ്​. രാജ്യമെമ്പാടും വിദ്യാർഥികൾ സമരപാതയിൽ. സമരം ചെയ്യുന്നവരെ ഭീകരരും മാവോവാദികളുമാക്കി ചിത്രീകരിക്കുകയാണ്​ സർക്കാർ. ഭരണത്തിൽ മോദി-അമിത് ​ഷാമാർ പരാജയപ്പെട്ടിരിക്കുന്നു. അതിൽനിന്ന്​ ശ്രദ്ധ തിരിക്കാനുള്ള തന്ത്രങ്ങളാണ്​ പയറ്റുന്നത്​. യുവശക്തി ഉണർന്നെഴുന്നേൽക്കുന്നത്​ മാറ്റത്തി​​െൻറ തിരമാല സൃഷ്​ടിക്കുമെന്ന്​ സോണിയ പറഞ്ഞു.