'വിശുദ്ധ മരം' വെട്ടിയെന്ന്​; യുവാവിനെ ജനക്കൂട്ടം തല്ലിക്കൊന്ന് കത്തിച്ചു

സിംഡേഗ: വിശുദ്ധമെന്ന്​ നാട്ടുകാർ വിശ്വസിക്കുന്ന മരങ്ങൾ പതിവായി മുറിക്കുന്നെന്ന്​ ആരോപിച്ച്​ ജനക്കൂട്ടം യുവാവിനെ തല്ലിക്കൊന്ന്​ മൃതദേഹം കത്തിച്ചു. ഝാർഖണ്ഡിലെ സിംഡേഗ ജില്ലയിലെ ബെസരാജ്ര ഗ്രാമത്തിൽ ചൊവ്വാഴ്ച ഉച്ചക്കാണ്​ സംഭവം. മരംവെട്ടിയായ സഞ്ജു പ്രധാൻ എന്ന 30കാരനെയാണ്​ കോപാകുലരായ ഗ്രാമീണർ തല്ലിക്കൊന്ന് കത്തിച്ചത്​.

ഇവിടുത്തെ മുണ്ട സമുദായം വിശുദ്ധമെന്ന് വിശ്വസിക്കുന്ന മരങ്ങൾ പതിവായി വെട്ടുകയും അതിന്‍റെ ചില്ലകൾ വിൽക്കുകയും ചെയ്യുന്നെന്ന്​ ആരോപിച്ചാണ്​ ആൾക്കൂട്ടം സഞ്ജുവിനെ ക്രൂരമായി മർദിച്ചുകൊന്നത്. സമുദായക്കാർ വളരെ പ്രാധാനം കൽപ്പിച്ച്​ ഒരു പ്രത്യേക സ്ഥലത്ത്​ നട്ടുപിടിച്ചിരിക്കുന്ന മരങ്ങൾ ഇയാൾ പതിവായി മുറിച്ചിരുന്നു. ഇത്​ തങ്ങളുടെ വിശ്വാസങ്ങൾക്ക്​ എതിരാണെന്ന്​ ചൂണ്ടിക്കാട്ടി സഞ്ജുവിനെതിരെ പലതവണ ഇവർ വനംവകുപ്പിൽ പരാതിപ്പെട്ടിരുന്നു.

ഒക്ടോബറിൽ മരങ്ങൾ മുറിച്ചതിനെ തുടർന്ന്​ പരാതി നൽകിയെങ്കിലും നടപടിയുണ്ടായില്ലയെന്ന്​ ഗ്രാമീണർ പറയുന്നു. രണ്ട്​ ദിവസം മുമ്പും സഞ്ജു ഇവിടെയെത്തി മരം മുറിച്ചു. തുടർന്ന് സമുദായക്കാർ യോഗം ചേരുകയും സഞ്ജു പ്രധാനെ അടിച്ചുകൊല്ലാൻ തീരുമാനമെടുക്കുകയുമായിരുന്നുവെന്ന് സിംഡേഗ പൊലീസ് പറഞ്ഞു.

തുടർന്ന്​ 150ഓളം പേർ സഞ്ജുവിന്‍റെ വീട്ടിലേക്ക്​ അതിക്രമിച്ച്​ കയറുകയും പുറത്തേക്ക്​ വലിച്ചിറക്കി മരിക്കുന്നതുവരെ ക്രൂരമായി മർദിക്കുകയുമായിരുന്നു. ഇയാളുടെ കത്തിക്കരിഞ്ഞ മൃതദേഹം ബെസരാജ്ര ബസാർ പ്രദേശത്ത് കണ്ടെത്തി. മൃതദേഹം അധികൃതർക്കു വിട്ടുകൊടുക്കാൻ നാട്ടുകാർ ആദ്യം തയ്യാറായില്ല. പൊലീസ് അനുനയിപ്പിച്ച ശേഷമാണ്​ നാട്ടുകാർ മൃതദേഹം വിട്ടുകൊടുത്തത്​. ഡിസംബർ 21നാണ്​ ഝാർഖണ്ഡ് നിയമസഭ 'ആൾക്കൂട്ട അതിക്രമങ്ങൾ തടയുന്നതിനുള്ള ബിൽ-2021' പാസാക്കിയത്​. ബിൽ അനുസരിച്ച് ഈ കുറ്റം ചെയ്യുന്നവർക്ക് മൂന്നുവർഷം മുതൽ ജീവപര്യന്തംവരെ തടവും പിഴയുമാണ് ശിക്ഷ.