ഡൽഹി കലാപത്തിലെ ഗൂഢാലോചന പുറത്തുകൊണ്ടുവന്ന മാധ്യമപ്രവർത്തകർക്ക്​ ക്രൂരമർദനം

ന്യൂഡൽഹി: 'ദി കാരവൻ' മാഗസിനിലെ മൂന്നു മാധ്യമപ്രവർത്തകർക്ക്​ നേരെ വടക്കുകിഴക്കൻ ഡൽഹിയിൽ ആൾക്കൂട്ട മർദനം.

പ്രഭ്​ജീത്​ സിങ്​, ഷാഹിദ്​ തിവാരി, വനിത മാധ്യമപ്രവർത്തക എന്നിവർക്ക്​ നേരെയാണ്​ കൈയേറ്റമുണ്ടായത്​. വർഗീയ പരാമർശങ്ങളുമായാണ്​ ആക്രമണമുണ്ടായതെന്ന്​ 'കാരവൻ' മാഗസിൻ എക്​സിക്യുട്ടീവ്​ എഡിറ്റർ വിനോദ്​.കെ.ജോസ്​ ഫേസ്​ബുക്കിൽ കുറിച്ചു.

വനിത മാധ്യമപ്രവർത്തകക്കു​നേരെ ആൾക്കൂട്ടം അസഭ്യവർഷം ചൊരിയുകയും നഗ്നത പ്രദർശനം നടത്തുകയും ചെയ്​തു. പരാതി നൽകിയെങ്കിലും ഇതുവരെ എഫ്​.ഐ.ആർ രജിസ്​റ്റർ ചെയ്​തിട്ടി​ല്ലെന്നും വിനോദ്​. കെ.ജോസ്​ കൂട്ടിച്ചേർത്തു.

ഡൽഹി കലാപത്തിൽ സംഘ്​പരിവാർ പങ്ക്​ പുറത്തുകൊണ്ടുവന്നതിൽ കാരവൻ മാഗസിൻ നിർണായക പങ്കുവഹിച്ചിരുന്നു. ഇതിലുള്ള അമർഷമാണ്​ ആക്രമണത്തിന്​ പിന്നിലെന്നാണ്​ സൂചന.