ശശികല പക്ഷം കോൺഗ്രസി​െൻറ പിന്തുണ തേടിയെന്ന്​ റിപ്പോർട്ട്​

ചെന്നൈ: ആഡംബര ഹോട്ടലുകളിൽ ഒളിപ്പിച്ചിട്ടും എം.എൽ.എമാർ ചോരുന്നത്​ അറിഞ്ഞ ശശികല വിഭാഗം പിന്തുണ തേടി കോൺഗ്രസിനെ സമീപിച്ചതായി റിപ്പോർട്ട്​. അടിയന്തര ഘട്ടമുണ്ടായാൽ സർക്കാർ ഉണ്ടാക്കാൻ പിന്തുണ നൽകണമെന്നാവശ്യപ്പെട്ട്​ കോൺഗ്രസ്​ ഹൈകമാൻഡിനെ സമീപിച്ചതായാണ്​ വിവരം​.

ഹൈകമാൻഡ്​ തമിഴ്​നാട്​ കോൺഗ്രസ്​ നേതാവ്​​ എസ്​. തിരുനാവുക്കരസറിനോടും ലെജിസ്​ലേറ്റീവ്​ പാർട്ടി നേതാവ്​ കെ. രാമസാമിയൊടും വെള്ളിയാഴ്​ച ഡൽഹിയിലെത്താൻ ആവശ്യ​െപ്പട്ടിട്ടുണ്ട്​. സംസ്​ഥാന താത്​പര്യങ്ങളിൽ കേന്ദ്രം ഇട​െപടുന്നുവെന്ന ആരോപണങ്ങളുടെ പശ്​ചാത്തലത്തിൽ ഉപദേശം ആരായുന്നതിനായാണ്​ സംസ്​ഥാന നേതാക്കളെ ഡൽഹിയിലേക്ക്​ വിളിപ്പിച്ചിരിക്കുന്നത്​. കോൺഗ്രസ്​ ഉപാധ്യക്ഷൻ രാഹുൽ ഗാന്ധിയും എം.എൽ.എമാരുമായി ചർച്ച നടത്തുമെന്ന്​ കരുതുന്നു.

ഹൈകമാൻഡിനെ കാണാൻ ശശികല പക്ഷം ശ്രമിച്ചതായി പാർട്ടി വൃത്തങ്ങൾ അറിയിച്ചു. ​നിലവിൽ എട്ട്​ എം.എൽ.എമാരുള്ള കോൺഗ്രസ്​ ഡി.എം.കെയുമായി സഖ്യത്തിലാണ്​. ഹൈകമാൻഡി​​െൻറ നിലപാട്​ പൊതുവിൽ അംഗീകരിക്ക​െപ്പടുന്നതായിരിക്കുമെന്നും ആത്​മഹത്യാപരമാകില്ലെന്നും കോൺഗ്രസ്​ വൃത്തങ്ങൾ അറിയിച്ചു.

234 അംഗങ്ങളുള്ള നിയമസഭയിൽ എ.​െഎ.എ.ഡി.എം.കെക്ക്​ 135 എം.എൽ.എമാരാണ്​ ഉള്ളത്​. വ്യാഴാഴ്​ച ശശികല ഗവർണറെ കണ്ട്​ 129എം.എൽ.എമാരു​െട പിന്തുണ തനിക്കുണ്ടെന്നും സർക്കാറുണ്ടാക്കാൻ അനുവദിക്കണമെന്നും ആവശ്യ​െപ്പട്ടിരുന്നു. എന്നാൽ 100 പേരുടെ പിന്തുണ മാത്രമേ ശശികലക്കുള്ളൂവെന്ന്​ ഒ. പന്നീർശെൽവം പക്ഷം ആരോപിച്ചു. ഗവർണർ അനുവദിക്കുകയാണെങ്കിൽ ഭൂരിപക്ഷം തെളിയിക്കാൻ താൻ തയാറാണെന്ന്​ പന്നീർശെൽവം പറഞ്ഞിരുന്നു. പാർട്ടി എം.എൽ.എമാരെ ആഡംബര ഹോട്ടലിൽ ശശികല തടവിലാക്കിയിരിക്കുകയാണെന്നും എം.എൽ.എമാർ നിരാഹാര സമരത്തിലാണെന്നും പന്നീർശെൽവം ആരോപിച്ചിരുന്നു.