മാനനഷ്ട കേസ്: പ്രിയാ രമണിക്ക് കോടതി സമൻസ് അയച്ചു

ന്യൂഡല്‍ഹി: മുന്‍ കേന്ദ്രമന്ത്രി എം.ജെ. അക്ബറിന് എതിരായ ലൈംഗിക ആരോപണ കേസില്‍ പത്രപ്രവര്‍ത്തക പ്രിയ രമണിക്ക് കോടതി സമന്‍സ് അയച്ചു. അക്ബര്‍ നല്‍കിയ മാനനഷ്​​ട കേസിലാണ് ഡല്‍ഹി പട്യാല കോടതി സമന്‍സ് അയച്ചത്. ഫെബ്രുവരി 25ന് മുമ്പായി ഹാജരാകണം.

അക്ബറി​​​െൻറ വാദങ്ങള്‍ കേട്ടശേഷമാണ് അഡീഷനല്‍ ചീഫ് മെട്രോപൊളിറ്റന്‍ മജിസ്ട്രേറ്റ് സമര്‍ വിശാല്‍ സമന്‍സ് അയച്ചത്. അക്ബറിനു വേണ്ടി അഭിഭാഷക ഗീത ലുത്രയും സന്ദീപ്​ കപൂറും ഹാജരായി.

പ്രിയ രമണിയാണ് ‘മീ റ്റൂ’ കാമ്പയിനിലൂടെ എം.ജെ. അക്ബറിനെതിരെ ആദ്യം ആരോപണമുന്നയിച്ചത്. പിന്നാലെ റൂത്ത് ഡേവിഡ് എന്ന വിദേശ മാധ്യമപ്രവര്‍ത്തകയുള്‍പ്പെടെ അക്ബറിനെതിരെ രംഗത്തുവന്നു. ആരോപണങ്ങള്‍ നിഷേധിച്ച എം.ജെ. അക്ബര്‍ പ്രിയ രമണിക്കെതിരെ മാനനഷ്​ട കേസ് ഫയല്‍ ചെയ്യുകയായിരുന്നു. ‘മീ റ്റൂ’ ആരോപണത്തെ തുടര്‍ന്ന് കഴിഞ്ഞ ഒക്ടോബറില്‍ അക്ബര്‍ കേന്ദ്ര മന്ത്രിസ്ഥാനം രാജിവെച്ചിരുന്നു. ടെലിഗ്രാഫ്, ഏഷ്യന്‍ ഏജ് തുടങ്ങിയ പത്രങ്ങളുടെ എഡിറ്ററായിരുന്നു അക്ബര്‍.