38 ഭാര്യമാർ, 89 മക്കൾ, 33 പേരമക്കൾ- ചരിത്രത്തിലെ ഏറ്റവും വലിയ കുടുംബനാഥൻ വിടവാങ്ങി

ന്യൂഡൽഹി: ഏറ്റവും വലിയ കുടുംബത്തെ സന്തോഷത്തോടെ നയിച്ച്​ ചരിത്രത്താളുകളിൽ ഇടംപിടിച്ച മിസോറാമുകാരനായ സിയോണ ചന വിടവാങ്ങി. ഞായറാഴ്ച വൈകുന്നേരം ഐസ്വാളിലെ ട്രിനിറ്റി ആശുപത്രിയിലായിരുന്നു 76 കാരനായ സിയോനയുടെ അന്ത്യം. പ്രമേഹവും രക്​താതിസമ്മർദവും മൂർഛിച്ച്​ മൂന്നു ദിവസമായി വീട്ടിൽ ചികിത്സയിലായിരുന്നു. പെ​ട്ടെന്ന്​ രോഗം മൂർഛിച്ച്​ ആശുപത്രി​യിലെത്തിച്ചെങ്കിലും അതിനു മു​െമ്പ മരണം സ്​ഥിരീകരിച്ചു.

വലിയ കുടുംബവുമായി കഴിയുന്ന സിയോണ ചന വാർത്തകളിൽ ഇടംപിടിച്ചതോടെ മിസോറാമിലെ ബാക്​തോങ്​ ലാങ്​ന്വാം ഗ്രാമം ടൂറിസ്റ്റുകളുടെ ഇഷ്​ട കേന്ദ്രങ്ങള​ിലൊന്നായിരുന്നു. പിതാവ്​ 1942ൽ സ്​ഥാപിച്ച പ്രത്യേക ക്രിസ്​ത്യൻ വിശ്വാസ വിഭാഗത്തിന്‍റെ നേതാവ്​ കൂടിയായിരുന്നു സിയോന. അംഗങ്ങൾക്ക്​ ബഹുഭാര്യത്വം അനുവദിക്കുന്ന ഈ വിഭാഗത്തിൽ 400 അംഗങ്ങളാണുള്ളത്​.

1945ൽ ജനിച്ച അദ്ദേഹം 17ാം വയസ്സിലാണ്​ തന്നെക്കാൾ മൂന്നു വയസ്സ്​ കൂടുതലുള്ള ആദ്യ ഭാര്യയെ വിവാഹം കഴിക്കുന്നത്​. 2004ലാണ്​ അവസാന ഭാര്യ ജീവിതത്തിന്‍റെ ഭാഗമാകുന്നത്​. കുടുംബ സമേതം 100 മുറികളുള്ള നാലു നില വീട്ടിലായിരുന്നു താമസം. ചുവാൻ താർ റൺ എന്നു പേരിട്ട ഈ വസതിയും അതിലെ കുടുംബവുമായിരുന്നു വിനോദസഞ്ചാരികളൂടെ പ്രധാന ആകർഷണം. മൊത്തം 180 അംഗങ്ങളാണ്​ ഈ വീട്ടിലുള്ളത്​.

കുടുംബത്തിലെ അംഗങ്ങൾക്കെല്ലാം സ്വന്തമായി മുറികളുണ്ടെങ്കിലും പൊതുവായ അടുക്കളയിലാണ്​ ഭക്ഷണം വിളമ്പുന്നത്​. സ്വന്തം അധ്വാനത്തിൽനിന്നുള്ള വരുമാനവും സംഭാവനകളുമാണ്​ കുടുംബത്തെ നിലനിർത്തിയിരുന്നത്​.