കാണാതായ ദർഗ ഭാരവാഹികൾ പാക്കിസ്​താനിൽ നിന്ന്​ ഇന്ന്​ തിരിച്ചെത്തും

ന്യൂ​ഡ​ൽ​ഹി: പാകിസ്​താനിൽ സന്ദർശനം നടത്തുന്നതിനിടെ കാണാതായ ഡൽഹി ഹ​സ്രത്ത്​ നിസാമുദ്ദീൻ ദർഗ ഭാരവാഹികൾ ഇന്ന്​ നാട്ടിലേക്ക്​ തിരിക്കും.സയിദ്​ ആസിഫ്​ നിസാമി (82), മരുമകൻ വാസിം അലി നിസാമി (66) എന്നിവരാണ്​ കറാച്ചിയിൽ നിന്ന്​ തിരിച്ചെത്തുന്നത്​. മാർച്ച്​ 14ന്​ കറാച്ചിയിൽനിന്ന്​ ഷഹീൻ എയർലൈൻസിൽ അല്ലാമ ഇഖ്​ബാൽ അന്താരാഷ്​ട്ര വിമാനത്താവളത്തിൽ എത്തിയ ഇവരെ പാക്​ ഇൻറലിജൻസ്​  കസ്​റ്റഡിയിലെടുക്കുകയായിരുന്നു.

അൽത്താഫ്​ ഹുസൈ​ൻ നേതൃത്വം നൽകുന്ന മുത്തഹിദ ഖൗമി മൂവ്​മ​െൻറുമായി ​ (എം.ക്യു.എം) ഇവർക്ക്​ ബന്ധമുണ്ടെന്നാണ്​ പാക്​ ഇൻറലിജൻസ്​ ആരോപിച്ചത്​. 1980ൽ കറാച്ചിയിലെ സിന്ധ്​ പ്രവിശ്യ ആസ്​ഥാനമായി അൽത്താഫ്​ ഹുസൈൻ രൂപവത്​കരിച്ച വർഗ ബഹുജന സംഘടനയാണ്​ മുത്തഹിദ ഖൗമി മൂവ്​മ​െൻറ്​. പാർട്ടി അധ്യക്ഷനായ അൽത്താഫ്​ ഹുസൈൻ അടുത്തിടെ നടത്തിയ രാജ്യവിരുദ്ധ പ്രസ്​താവനയുടെ പേരിൽ സംഘടനയെ പാക്​ സർക്കാർ നിരോധിച്ചിരുന്നു​. ഇൗ സംഘടയുമായി ബന്ധമുണ്ടെന്ന സംശയത്തെ തുടർന്ന്​ കസ്​റ്റഡിയിലെടുത്ത ഇരുവരെയും ചോദ്യം ചെയ്യുന്നതിനായി അജ്​ഞാത കേന്ദ്രത്തിലേക്ക്​ മാറ്റിയിരുന്നു. ഇവർ ഇപ്പോൾ കറാച്ചിയിലാണുള്ളത്​.

ഇൗ മാസം ആറിനാണ്​ ഇരുവരും പാകിസ്​താനിലേക്ക്​ പോയത്​. വ്യാഴാഴ്​ചക്കുശേഷം ഇരുവരെയും കുറിച്ച്​ വിവരമില്ലെന്നാണ്​ ബന്ധുക്കളുടെ പരാതി. ഫോണുകൾ സ്വിച്ച്​ ഒാഫ്​ ചെയ്​ത നിലയിലായിരുന്നു. വിഷയം പാക്​ സർക്കാറി​​െൻറ ​ശ്രദ്ധയിൽപെടുത്തിയിട്ടുണ്ടെന്നും അന്വേഷിച്ച്​ വിവരം നൽകാൻ ആവശ്യപ്പെട്ടിട്ടുണ്ടെന്നും വിദേശകാര്യ മന്ത്രി സുഷമ സ്വരാജ്​ ട്വിറ്ററിലൂടെ അറിയിച്ചിരുന്നു. പാക്​ പ്രധാനമന്ത്രിയുടെ വിദേശകാര്യ ഉപദേശകനായ സർതാജ്​ അസീസുമായി സുഷമ സ്വരാജ്​ ഫോണിലൂടെ ചർച്ച നടത്തിയതിന്​ ശേഷമാണ്​ ദർഗ ഭാരവാഹികളെ വിട്ടയക്കാൻ തീരുമാനമായത്​.