നീറ്റ്​ പരീക്ഷ തോൽവി; തമിഴ്​നാട്ടിൽ വീണ്ടും വിദ്യാർഥി ആത്മഹത്യ

ചെന്നൈ: തമിഴ്​നാട്ടിൽ മെഡിക്കൽ പ്രവേശനപരീക്ഷയായ നീറ്റിൽ തോറ്റതിന്‍റെ മനോവിഷമത്തിൽ വിദ്യാർഥി ആത്മഹത്യ ചെയ്തു. നീലഗിരി ജില്ലയിലാണ്​ സംഭവം.

സന്തോഷവതിയാണെന്ന്​ അഭിനയിക്കാൻ കഴിയില്ലെന്നും മാതാപിതാക്കൾ​ ക്ഷമിക്കണമെന്നും പെൺകുട്ടിയുടെ ആത്മഹത്യക്കുറിപ്പിൽ പറയുന്നു. 12ാം ക്ലാസ്​ പരീക്ഷക്ക്​ ശേഷം 17കാരി സെപ്​റ്റംബറിൽ നീറ്റ്​ പരീക്ഷ എഴുതി. എന്നാൽ നീറ്റിൽ വിജയിക്കാൻ കഴിയാതെ വന്നതോടെ പെൺകുട്ടി വിഷാദരോഗത്തിന്​ അടിമയാകുകയായിരുന്നു.

തുടർന്ന്​, പെൺകുട്ടിയുടെ വിഷമം മനസിലാക്കിയ മാതാപിതാക്കൾ തിരുപ്പൂർ ജില്ലയിലെ ബന്ധുക്കളുടെ വീട്ടിലേക്ക്​ അയച്ചു. എന്നാൽ ദീപാവലിക്ക്​ കുട്ടി വീട്ടിൽ തിരിച്ചെത്തി. ഡിസംബർ 18ന്​ പെൺകുട്ടി കുറിപ്പ്​ എഴുതിവെച്ചശേഷം ആത്മഹത്യക്ക്​ ശ്രമിക്കുകയായിരുന്നു.

മേട്ടുപാളയത്തിലെ സ്വകാര്യ ആശുപത്രിയിൽ ചികിത്സയിലായിരുന്ന വിദ്യാർഥിനി 23ന്​ മരിച്ചു. നീറ്റ്​ പരീക്ഷയിൽ തോറ്റതിൻറെ മനോവിഷമത്തിൽനിന്ന്​ കരകയറാൻ തനിക്ക്​ സാധിക്കുന്നില്ല. എല്ലാവരുടെയും മുമ്പിൽ സന്തോഷവതിയാണെന്ന്​ നടിക്കാൻ കഴിയില്ലെന്നും പെൺകുട്ടിയുടെ കുറിപ്പിൽ പറയുന്നു.

തമിഴ്​നാട്ടിൽ നവംബർ ഏഴിന്​ നീറ്റ്​ പരീക്ഷയിൽ തോറ്റതിന്​ ഒരു വിദ്യാർഥി ആത്മഹത്യ ചെയ്തിരുന്നു.