ദുരിത ബാധിതർക്ക്​ മന്ത്രി ബിസ്​കറ്റ്​ എറിഞ്ഞു നൽകിയത്​ വിവാദമായി-VIDEO

ബംഗളൂരു: കർണാടകയിലുണ്ടായ വെള്ളപ്പൊക്കത്തിൽ അക​പ്പെട്ട്​ ദുരിതാശ്വാസ ക്യാമ്പിലെത്തിയവർക്ക്​ ബിസ്​കറ്റ്​ പാക്കുകൾ എറിഞ്ഞുകൊടുത്ത കർണാടക പൊതുമരാമത്ത്​ വകുപ്പ്​ മന്ത്രി എച്ച്​.ഡി. രേവണ്ണയുടെ നടപടി വിവാദത്തിൽ. 

കർണാടകയിലെ ഹസ്സൻ ജില്ലയിലെ ദുരിതാശ്വാസ ക്യാമ്പിലെത്തിയ രേവണ്ണ ബിസ്​കറ്റ്​ പാക്കുകൾ ഒാരോന്നായി സ്​​ത്രീകളും കുട്ടികളുമടങ്ങിയ ദുരിത ബാധിതർക്കിടയിലേക്ക്​ വലിച്ചെറിയുകയായിരുന്നു. ഇൗ ദൃശ്യങ്ങൾ സമൂഹ മാധ്യമങ്ങളിൽ പ്രചരിക്കുകയാണ്​. കർണാടക  മുഖ്യമന്ത്രി എച്ച്​.ഡി. കുമാരസ്വാമിയുടെ സഹോദരനാണ്​ എച്ച്​.ഡി. രേവണ്ണ.

ക്യാമ്പിൽ മതിയായ സ്​ഥല സൗകര്യം ഇല്ലാത്തിനാലാണ്​ രേവണ്ണയുടെ ഭാഗത്തു നിന്ന്​ അത്തരമൊരു​ പ്രവർത്തി ഉണ്ടായതെന്ന്​ കുമാരസ്വാമി പറഞ്ഞു. സംഭവം വാർത്തയായതോടെ സമൂഹമാധ്യമങ്ങളിൽ രൂക്ഷ വിമർശനങ്ങൾ ഉയർന്നു. കഴിഞ്ഞ ഏതാനും ദിവസങ്ങളായി കർണാടകയിലെ നിരവധി ജില്ലകൾ കനത്ത മഴയെ തുടർന്ന് ​വെള്ളക്കെട്ടിലാണ്​.