'അജയ്​ മിശ്ര ക്രിമിനൽ'; പുറത്താക്കണമെന്ന്​ ആവശ്യപ്പെട്ട്​ പാർലമെന്‍റിൽ പ്രതിപക്ഷ പ്രതിഷേധം

ന്യൂഡൽഹി: ലഖിംപൂർഖേരി സംഭവത്തിൽ പ്രത്യേക അന്വേഷണസംഘത്തിന്‍റെ റിപ്പോർട്ട്​ പുറത്ത്​ വന്നതിന്​ പിന്നാലെ പ്രതിഷേധം ശക്​തമാക്കി പ്രതിപക്ഷം. കേന്ദ്ര ആഭ്യന്തര സഹമന്ത്രി അജയ്​ മിശ്ര ക്രിമിനലാണെന്നും സഹമന്ത്രിപദം രാജിവെക്കണമെന്നും കോൺഗ്രസ്​ നേതാവ്​ രാഹുൽ ഗാന്ധി ആവശ്യപ്പെട്ടു. രാജിവെക്കാൻ തയാറായില്ലെങ്കിൽ അജയ്​ മിശ്രയെ പുറത്താക്കണമെന്ന്​ അദ്ദേഹം പറഞ്ഞു.

ലഖിംപുർ ഖേരിയിലെ കൊലപാതകത്തെ കുറിച്ച്​ സംസാരിക്കാൻ ഞങ്ങളെ അനുവദിക്കണം. അതിൽ മന്ത്രിയുടെ പങ്കുണ്ടെന്നാണ്​ തെളിയുന്നത്​. ഇപ്പോൾ കൊലപാതകത്തിൽ ഗൂഢാലോചനയുണ്ടെന്ന റിപ്പോർട്ട്​ പുറത്ത്​ വന്നിരിക്കുകയാണെന്നും രാഹുൽ ഗാന്ധി പറഞ്ഞു. പല പ്രതിപക്ഷ പാർട്ടി എം.പിമാരും ഇതുസംബന്ധിച്ച്​ പാർലമെന്‍റിൽ അടിയന്തര പ്രമേയത്തിന്​ നോട്ടീസ്​ നൽകി.

അജയ്​ മിശ്രയെ പുറത്താക്കണമെന്ന്​ പ്രിയങ്ക ഗാന്ധിയും ആവശ്യപ്പെട്ടു. ട്വിറ്ററിലൂടെയായിരുന്നു പ്രിയങ്ക ഗാന്ധിയുടെ ആവശ്യം. മിശ്രയെ പുറത്താക്കിയില്ലെങ്കിൽ സർക്കാറിന്‍റെ ധാർമികമായ പാപ്പരത്തമാവും പുറത്ത്​ വരികയെന്ന്​ പ്രിയങ്ക ഗാന്ധി പറഞ്ഞു.

നരേന്ദ്ര മോദി സൂക്ഷ്​മതയോടെ കൊണ്ടു നടക്കുന്ന മതപരമായ വസ്​ത്രധാരണവും ഭക്​തിയുടെ കണ്ണടകളും നിങ്ങളൊരു ക്രിമിനലിനെ സംരക്ഷിക്കുന്നുവെന്ന വസ്​തുത മാറ്റില്ലെന്നും പ്രിയങ്ക ഗാന്ധി കൂട്ടിച്ചേർത്തു. നാഷണൽ കോൺഫറൻസ്​ നേതാവ്​ ഫറൂഖ്​ അബ്​ദുല്ലയും അജയ്​ മിശ്രയെ പുറത്താക്കണമെന്ന ആവശ്യം ഉന്നയിച്ചിട്ടുണ്ട്​.

ലഖിംപൂർ ഖേരിയിൽ കർഷകരെ വാഹനമിടിപ്പിച്ച്​ കൊലപ്പെടുത്തിയ സംഭവം മുൻകൂട്ടി ആസൂത്രണം ചെയ്​തതാണെന്ന്​ പ്രത്യേക അന്വേഷണ സംഘം കോടതിയെ അറിയിച്ചിരുന്നു. അജയ്​ മിശ്രയുടെ മകൻ ആശിഷ്​ മിശ്ര ഉൾപ്പടെ 13 പേർക്കെതിരെ വധശ്രമം ഉൾപ്പടെയുള്ള വകുപ്പുകൾ ചുമത്താൻ അനുവദിക്കണമെന്നും ആവശ്യപ്പെട്ടിരുന്നു.