മേയർ സ്​ഥാനാർഥിയായി സോനു സൂദ്​, റിതേഷ്​ ദേശ്​മുഖ്​, മിലിന്ദ്​ സോമൻ​?; മുംബൈ കോർപറേഷൻ പിടിക്കാൻ കോൺഗ്രസ്​

മുംബൈ: അടുത്ത വർഷം നടക്കാൻ പോകുന്ന ബൃഹൻമുംബൈ മുനിസിപ്പൽ കോർപറേഷൻ തെരഞ്ഞെടുപ്പിനെ നേരിടാൻ തന്ത്രങ്ങളുമായി കോൺഗ്രസ്​. നടൻമാരായ റിതേഷ്​ ദേശ്​മുഖ്​, സോനു സൂദ്​, മിലിന്ദ്​ സോമൻ എന്നിവരിലൊരാളെ മേയർ സ്​ഥാനാർഥിയാക്കി നേരത്തെ തന്നെ പ്രചാരണം തുടങ്ങാനാണ്​ നീക്കങ്ങൾ.

മേയർ സ്​ഥാനാർഥിയായി പരിഗണിക്കുന്ന മൂന്ന്​ പേരും കോൺഗ്രസ്​ അംഗങ്ങളല്ല​. എന്നാൽ മുൻ മഹാരാഷ്​ട്ര മുഖ്യമന്ത്രിയും കോൺഗ്രസ്​ നേതാവുമായിരുന്ന വിലാസ്​റാവു ദേശ്​മുഖിന്‍റെ മകനാണ്​ റിതേഷ്​.

തെരഞ്ഞെടുപ്പ്​ തന്ത്രങ്ങളടങ്ങിയ 25 പേജ്​ കരട്​ സിറ്റി കോൺഗ്രസ്​ സെക്രട്ടറി ഗണേഷ്​ യാദവ്​ തയാറാക്കിയിട്ടുണ്ട്​. അടുത്ത ദിവസങ്ങളിൽ ഇത്​ മഹാരാഷ്​ട്രയുടെ ചുമതലയുള്ള എ.ഐ.സി.സി ജനറൽ സെക്രട്ടറി എച്ച്.കെ. പാട്ടീൽ മുമ്പാകെ അവതരിപ്പിക്കും. ​മുംബൈ കോൺഗ്രസ്​ അധ്യക്ഷൻ ഇത്​ മുതിർന്ന പാർട്ടി നേതാക്കളുമായി ചർച്ച ​െചയ്യുമെന്ന്​ യാദവ്​ പറഞ്ഞു.

പൊതുസമ്മതനായ ഒരാളെ തെരഞ്ഞെടുപ്പിന്​ മുമ്പ്​ തന്നെ മേയർ സ്​ഥാനാർഥിയാക്കി ഉയർത്തിക്കാണിക്കണമെന്നാണ്​ കരടിൽ പ്രധാനമായും പറയുന്നത്​. മേയർ സ്​ഥാനാർഥിക്ക്​ യുവാക്കളുടെ സമ്മതിയുണ്ടായിരിക്കണമെന്ന്​ നിർബന്ധമുണ്ട്​. യുവ പ്രഫഷനലുകൾക്കും സാമൂഹിക പ്രവർത്തകർക്കുമായി ചെറിയൊരു ശതമാനം സീറ്റുകൾ നീക്കിവെക്കണം.

അതോടൊപ്പം തന്നെ വരാൻ പോകുന്ന തെരഞ്ഞെടുപ്പുകളിൽ ​ശിവസേനയുമായി നേരിട്ട്​ സഖ്യത്തിൽ ഏർപ്പെടുമോ എന്ന കാര്യത്തിൽ പാർട്ടി വ്യക്തത വരുത്തണം​. കോൺഗ്രസ് ഒറ്റക്ക്​ മത്സരിക്കുകയാണെങ്കിൽ 147 സീറ്റുകളിലേക്ക്​ ഉടൻ സ്​ഥാനാർഥികളെ പ്രഖ്യാപിക്കണം. വഞ്ചിത്​ ബഹുജൻ അഗാഡിയു​ം അസദുദ്ദീൻ ഉവൈസിയുടെ എ.ഐ.എം.ഐ.എമ്മും ബി.ജെ.പിയുടെ ബി ടീമാണെന്ന പ്രചാരണത്തിന്​ ഊന്നൽ നൽകണമെന്നും കരടിൽ നിർദേശിക്കുന്നു.