നാട്ടിൽ പോകണമെന്നാവശ്യപ്പെട്ട്​ മുംബൈയിൽ അന്തർ സംസ്​ഥാന തൊഴിലാളികൾ തെരുവിലിറങ്ങി

മുംബൈ: സ്വന്തം നാടുകളിലേക്ക്​ തിരിച്ചുപോകാൻ സൗകര്യമൊരുക്കണമെന്നാവശ്യപ്പെട്ട്​ മുംബൈയിൽ അന്തർസംസ്​ഥാന ത ൊഴിലാളികൾ തെരുവിലിറങ്ങി. ആയിരക്കണക്കിന്​ പേരാണ്​ ബാ​ന്ദ്ര റെയിൽവേ സ്​റ്റേഷന്​ സമീപം തടിച്ചുകൂടിയത്​. മെയ്​ മൂന്ന്​ വരെ ലോക്​ഡൗൺ നീട്ടിയതോടെയാണ്​ ഇവർ നാട്ടിൽ പോകണമെന്നാവശ്യവുമായി തെരുവിലിറങ്ങിയത്​. പൊലീസെത്തി​ ഇവരെ റോഡിൽനിന്ന്​ നീക്കി​.

സംഭവത്തിൽ കേന്ദ്ര ആഭ്യന്തര മന്ത്രി അമിത്​ ഷാ മഹാരാഷ്​ട്ര മുഖ്യമന്ത്രി ഉദ്ദവ്​ താക്കറയെ വിളിച്ച്​ വിവരം ആരാഞ്ഞു. ഇത്തരം സംഭവങ്ങൾ കോവിഡിനെതിരായ പോരാട്ടത്തെ ക്ഷയിപ്പിക്കുമെന്നും സമാനസാഹചര്യങ്ങൾ ഉണ്ടാകാതിരിക്കാൻ നടപടി വേണമെന്നും അദ്ദേഹം ആവശ്യപ്പെട്ടു. സ്​ഥിതിഗതികൾ നിയന്ത്രിക്കുന്നതിന്​ എല്ലാവിധ പിന്തുണയും അദ്ദേഹം ഉറപ്പുനൽകി.

അതേസമയം, ശിവസേന നേതാവും മന്ത്രിയുമായ ആദിത്യ താക്കറെ കേന്ദ്ര സർക്കാറിനെ കുറ്റപ്പെടുത്തി രംഗത്തെത്തി. തൊഴിലാളികളെ അവരവരുടെ നാടുകളിലേക്ക്​ മടക്കിയയക്കാൻ കേന്ദ്രം സൗകര്യമൊരുക്കാത്തതിനാലാണ്​ പ്രശ്​നം രൂക്ഷമാകുന്നതെന്ന്​ അദ്ദേഹം പറഞ്ഞു. ഗുജറാത്തിലെ സൂറത്തിലും സമാന സംഭവമാണുണ്ടായത്​. ഭക്ഷണവും താമസവുമല്ല അവർക്ക്​ വേണ്ടത്​. നാട്ടിലേക്ക്​ പോകാനുള്ള സൗകര്യമാണ്​ അവർ ആ​വ​ശ്യപ്പെടുന്നതെന്നും ആദിത്യ താക്കറെ പറഞ്ഞു.

നേരത്തെ കാര്യമായ മുൻകരുതലുകൾ ഏർപ്പെടുത്താതെയാണ്​ രാജ്യത്ത്​ ലോക്ക്​ഡൗൺ പ്രഖ്യാപിച്ചതെന്ന്​ ആക്ഷേപം ഉയർന്നിരുന്നു. ഇതി​​െൻറ ഫലമായി പതിനായിരങ്ങളാണ്​ ഡൽഹിയിൽനിന്നടക്കം സ്വദേശത്തേക്ക്​ കാൽനടയായി പാലായനം ചെയ്യേണ്ടി വന്നത്​.