You are here

എൽ.ടി.ടി.ഇ അനുകൂല പ്രസംഗം: വൈക്കോക്ക്​ ​ ഒരു വർഷം തടവുശിക്ഷ

ചെന്നൈ: രാജ്യദ്രോഹ കേസിൽ മറുമലർച്ചി ദ്രാവിഡ മുന്നേറ്റ കഴകം (എം.ഡി.എം.കെ) ജനറൽ സെക്രട്ടറി വി. ഗോപാലസ്വാമി എന്ന വൈക്കോക്ക്​ ഒരു വർഷത്തെ തടവും 10,000 രൂപ പിഴയും വിധിച്ച്​ ചെന്നൈ പ്രത്യേക കോടതി. നിരോധിത സംഘടനയായ എൽ.ടി.ടി.ഇക്ക്​ അനുകൂലമായും കേന്ദ്ര സർക്കാറിന്​ എതിരായും പ്രസംഗിച്ചതിനാണ്​ ജനപ്രതിനിധികളുടെ കേസുകൾ കൈകാര്യം ചെയ്യുന്ന പ്രത്യേക കോടതി ജഡ്​ജി ജെ. ശാന്തി ശിക്ഷ പ്രഖ്യാപിച്ചത്​. 

2008ൽ ചെന്നൈ രാജ അണ്ണാമല ഹാളിൽ നടന്ന വൈക്കോയുടെ ശ്രീലങ്കൻ തമിഴ്​ വംശജരുടെ പ്രശ്​നങ്ങൾ പ്രതിപാദിക്കുന്ന  ‘നാൻ കുറ്റ്​റം സാട്ടുകിറേൻ’ (ഞാൻ കുറ്റം ചുമത്തുന്നു) എന്ന പുസ്​തകത്തി​​െൻറ പ്രകാശന ചടങ്ങിലാണ്​ വിവാദ പരാമർശം നടത്തിയത്​.  ശ്രീലങ്കയിൽ എൽ.ടി.ടി.ഇക്കെതിരായ ആഭ്യന്തരയുദ്ധം അവസാനിപ്പിക്കാത്തപക്ഷം ഇന്ത്യ അഖണ്ഡ രാജ്യമായി തുടരില്ലെന്നായിരുന്നു വൈക്കോയുടെ പരാമർശം.

ഇൗ കാലയളവിൽ കേന്ദ്രത്തിൽ യു.പി.എ സർക്കാറും  തമിഴ്​നാട്ടിൽ ഡി.എം.കെ സർക്കാറുമാണ്​ ഭരിച്ചിരുന്നത്​. പ്രസംഗം വിവാദമായതോടെയാണ്​​ വൈക്കോക്കെതിരെ സെക്​ഷൻ ‘124 എ’ പ്രകാരം രാജ്യദ്രോഹക്കുറ്റം ചുമത്തി ചെന്നൈ ആയിരംവിളക്ക്​ പൊലീസ്​ കേസ്​ രജിസ്​റ്റർ ചെയ്​തത്​. പിഴ തുക കെട്ടിവെച്ച വൈക്കോക്ക്​ അപ്പീൽ ഹരജി സമർപ്പിക്കുന്നതിനുവേണ്ടി ശിക്ഷ ഒരു മാസത്തേക്ക്​ നിർത്തിവെക്കാൻ കോടതി ഉത്തരവിട്ടു. 

ജൂലൈ 18ന്​ നടക്കുന്ന രാജ്യസഭ തെരഞ്ഞെടുപ്പിൽ ഡി.എം.കെ മുന്നണി സ്​ഥാനാർഥിയായി വൈക്കോ ശനിയാഴ്​ച പത്രിക സമർപ്പിക്കാനിരിക്കെയാണ്​ കോടതിവിധി. തടവുശിക്ഷ രണ്ടു വർഷത്തിൽ കുറവാണെങ്കിലും രാജ്യദ്രോഹ കേസിൽ  കോടതി ശിക്ഷിച്ചനിലയിൽ വൈക്കോയുടെ നാമനിർദേശപത്രിക സ്വീകരിക്കുമോയെന്ന്​ ആശങ്ക ഉയർന്നിട്ടുണ്ട്. 2002ൽ ജയലളിത സർക്കാറും പോട്ട നിയമപ്രകാരം വൈക്കോയെ ഒന്നര വർഷക്കാലം ജയിലിലടച്ചിരുന്നു. 

വിധിപ്രസ്​താവത്തിനുശേഷം കോടതിയിൽനിന്ന്​ പുറത്തിറങ്ങിയ വൈക്കോ ത​​െൻറ ജീവിതത്തിൽ സന്തോഷപ്രദമായ ദിനമാണിതെന്നും എൽ.ടി.ടി.ഇ അനുകൂല നിലപാട്​ തുടരുമെന്നും മാധ്യമ പ്രവർത്തകരോട്​ പറഞ്ഞു. 

Loading...
COMMENTS