ഭീകരശക്​തികൾ നേടുന്നത്​ താൽക്കാലിക നേട്ടം മാത്ര​മാണെന്ന്​ നരേന്ദ്ര മോദി

ന്യൂഡൽഹി: ഭീകര ശക്​തികൾ നേടുന്നത്​ താൽക്കാലികമായ നേട്ടം മാത്ര​മാണെന്ന്​ പ്രധാന മന്ത്രിനരേന്ദ്ര മോദി.ഭീകരതയിലൂടെ സാ​മ്രാജ്യങ്ങൾ സൃഷ്​ടിക്കുക എന്ന പ്രത്യയശാസ്​ത്രം പിന്തുടരുന്ന ആളുകൾക്ക്​ കുറച്ചുകാലമെ ആധിപത്യം പുലർത്താനാകു.

മനുഷ്യത്വത്തെ എല്ലാ കാലവും അടിച്ചമർത്താൻ ഇവർക്ക് സാധിക്കില്ലെന്നും അദ്ദേഹം പറഞ്ഞു. അഫ്ഗാനിസ്ഥാൻ താലിബാൻ പിടിച്ചടക്കിയ പശ്ചാത്തലത്തിലാണ്​ പരാമർശം. ഗുജറാത്തിലെ സോമനാഥ ക്ഷേത്രത്തിലെ വിവിധ പദ്ധതികളുടെ ഉദ്ഘാടനം വീഡിയോ കോൺഫറൻസിങ് വഴി നിർവഹിക്കുകയായിരുന്നു അദ്ദേഹം.

അ​െത സമയം അഫ്​ഗാനിസ്​താനിലെ ഇന്ത്യൻ കോൺസ​ുലേറ്റുകളിൽ താലിബാൻ പരിശോധന​ നടത്തിയ വാർത്ത രാവിലെ പുറത്തുവന്നിരുന്നു. കഴിഞ്ഞ ദിവസം ഇന്ത്യയുമായുള്ള വ്യാപാര ബന്ധം താലിബാൻ നിർത്തിവെച്ചിരുന്നു. ഈ പശ്ചാത്തലം കൂടി മോദിയുടെ ​പ്രസ്​താവനക്ക്​ പിന്നിലുണ്ടെന്നാണ്​ വിലയിരുത്തൽ.

കാണ്ഡഹാറിലെയും ഹെറാത്തിലെയും കോൺസ​ുലേറ്റുകളിലാണ്​ താലിബാൻ പരിശോധന നടത്തിയത്​. ഓഫീസിലെ​ വിവിധ രേഖകൾ പരിശോധിക്കുകയും കോൺസുലേറ്റിലെ വാഹനങ്ങൾ കടത്തിക്കൊണ്ടുപോവുകയും ചെയ്​തിട്ടുണ്ട്​. ബുധനാഴ്ചയാണ്​ കോൺസുലേറ്റുകളിൽ താലിബാൻ പരിശോധന നടത്തിയതെന്ന്​ ​അന്തർദേശീയ മാധ്യമങ്ങൾ റിപ്പോർട്ട്​ ചെയ്​തു.

താലിബാൻ അധികാരം പിടിച്ചതിന് പിന്നാലെ കാബൂളിലെ ഇന്ത്യൻ എംബസി ഒഴിപ്പിച്ചിരുന്നു. അംബാസഡറും നയതന്ത്ര പ്രതിനിധികളും മാധ്യമപ്രവർത്തകരും അടക്കം 180 പേരെ പ്രത്യേക വിമാനത്തിലാണ് ഇന്ത്യ​ ഡൽഹിയിലെത്തിച്ചത്. കഴിഞ്ഞ തിങ്കളാഴ്ച കാബൂളിൽ നിന്ന് 46 ഉദ്യോഗസ്ഥരെയും മറ്റ് ചില ഉപകരണങ്ങളും വ്യോമസേനാ വിമാനത്തിൽ ഡൽഹിയിൽ എത്തിച്ചിരുന്നു.