കേൾവി വൈകല്യമുള്ളവർക്ക്​  ആശ്വാസവുമായി സുതാര്യ മാസ്​ക്​

ന്യൂഡൽഹി: കോവിഡ്​ വ്യാപനം  ചെറുക്കാൻ എല്ലാവരും മാസ്​ക്​  ധരിച്ചതോടെ പ്രയാസത്തിലായ ചെറുവിഭാഗമുണ്ട്​ നമ്മുടെയിടയിൽ. ആളുകളുടെ ചുണ്ടനക്കം നോക്കി കാര്യങ്ങൾ മനസ്സിലാക്കുന്ന കേൾവി വൈകല്യമുള്ളവർ. പ്രിയപ്പെട്ടവരെല്ലാം  വായും മൂക്കും മൂടിക്കെട്ടിയതോടെ  ഇവരുടെ ആശയവിനിമയം തന്നെ നിലച്ചമട്ടാണ്​. എന്നാൽ, ഈ പ്രയാസം  പരിഹരിക്കാൻ ‘സുതാര്യ  മാസ്കു’മായി  രംഗത്തെത്തിയിരിക്കുകയാണ്​  ചെന്നൈയിലെ ഒരു സന്നദ്ധ സംഘടന.

ഭക്ഷണം പാ​ഴാക്കുന്നതിനെതിരെ പ്രവൃത്തിക്കുന്ന ‘നോ ഫുഡ് വേസ്റ്റ്’ എന്ന സംഘടനയാണ്​ ഈ  ശ്രമത്തിനുപിന്നിൽ. കുട്ടികൾ മുതൽ  മുതിർന്നവർ വരെയുള്ളവരിൽ ഈ  മാസ്​ക്​ പരീക്ഷിച്ചതായി സംഘടയുടെ  പ്രതിനിധി എ.ജി. പദ്മനാഭൻ  പറഞ്ഞു. ശ്രവണ വൈകല്യമുള്ളവരുടെ സംഘടനകൾക്കും സർക്കാരിനും ഇവർ സുതാര്യ മാസ്​ക്​ നൽകിയിട്ടുണ്ട്. അവരുടെ  പ്രതികരണത്തിനായി കാത്തിരിക്കുകയാണെന്നും ആവശ്യമായ  മാറ്റങ്ങൾ വരുത്തി കൂടുതൽ ഉത്പാദനം നടത്തുമെന്നും പദ്മനാഭൻ  പറഞ്ഞു.

തിരുച്ചി സ്വദേശിയായ മുഹമ്മദ് ഹക്കീമും സമാനമായ മാസ്​ക്​ നിർമിച്ചിട്ടുണ്ട്​. ഒറ്റത്തവണ ഉപയോഗിക്കാവുന്നതും  പുനരുപയോഗിക്കാവുന്നതുമായ മുഖാവരണങ്ങളാണ്​ ഇദ്ദേഹം നിർമിച്ചത്​. സർക്കാരി​​െൻറ അംഗീകാരം ലഭിച്ചാൽ 1,000  മാസ്കുകൾ നിർമിച്ച്​ ആവശ്യക്കാർക്ക്​ സൗജന്യമായി വിതരണം ചെയ്യുമെന്ന്​ ഹക്കീം പറഞ്ഞു. 

സുതാര്യ മാസ്കുകൾ ലഭ്യമാണോ എന്ന് ചോദിച്ച് കഴിഞ്ഞ ഏതാനും ആഴ്ചകളായി ശ്രവണ വൈകല്യമുള്ള  നിരവധി പേർ തന്നെ സമീപിച്ചതായി ആംഗ്യഭാഷ പരിശീലകനായ എൻ.  വിനോത്ത് പറഞ്ഞു. ചുണ്ടനക്കത്തെ  ആശ്രയിച്ച്​ ആശയവിനിമയം നടത്തുന്ന നിരവധിപേരാണ്​ കോവിഡ്​ മൂലം പ്രയാസത്തിലായതെന്ന്​ അദ്ദേഹം പറഞ്ഞു.