ആംബുലൻസ്​ എത്തിയില്ല; പ്രസവത്തെ തുടർന്ന്​ മറാത്തി നടിയും കുഞ്ഞും മരിച്ചു

മുംബൈ: പ്രസവശേഷം വിദഗ്ധചികിത്സ ലഭിക്കാത്തതിനെ തുടര്‍ന്ന് മറാത്തി നടിയും നവജാത ശിശുവും മരിച്ചു. മറാത്തി സിനിമ -ടിവി താരമായ പൂജ സുൻജാറും (25) കുഞ്ഞുമാണ് ആശുപത്രിയിലെത്തിക്കാന്‍ വൈകിയതിനെ തുടര്‍ന്ന് മരിച്ചത്.

മഹാരാഷ്​ട്രയിലെ ഹിൻഗോളി ജില്ലയിൽ ഞായറാഴ്​ച പുലർച്ചെയാണ്​ സംഭവം. രാവിലെ രണ്ട്​ മണിയോടെ
പ്രസവവേദനയെ തുടര്‍ന്ന് പൂജയെ ഗോരേഗാവിലെ പ്രാഥമിക ആരോഗ്യകേന്ദ്രത്തിലെത്തിച്ചു. ഇവിടെ വെച്ച്​ പൂജ പ്രസവിച്ചെങ്കിലും കുഞ്ഞ് നിമിഷങ്ങള്‍ക്കുള്ളില്‍ മരിച്ചു. ആരോഗ്യനില മോശമായതിനാൽ പൂജയെ ഹിൻഗോളി സിവില്‍ ആശുപത്രിയിലെത്തിക്കാന്‍ അധികൃതര്‍ നിര്‍ദേശിച്ചു. എന്നാൽ ആംബുലൻസ്​ ലഭിക്കാൻ വൈകിയതോടെ ആരോഗ്യനില വീണ്ടും വഷളാവുകയായിരുന്നു.

ആംബുലന്‍സെത്തി 40 കിലോമീറ്റര്‍ അകലെയുള്ള ആശുപത്രിയിലെത്തിച്ചെങ്കിലും യാത്രക്കിടെ രാവിലെ ആറരയോടെ പൂജയും മരിച്ചു. ആശുപത്രിയിലെത്തിക്കാന്‍ കൃത്യസമയത്ത് ആംബുലന്‍സ് ലഭിക്കാതിരുന്നതാണ് പൂജയുടേയും കുഞ്ഞി​​െൻറയും ജീവന്‍ നഷ്ടമാകാന്‍ ഇടയാക്കിയതെന്ന് ആരോപിച്ച്​ ബന്ധുക്കൾ പൊലീസിൽ പരാതി നൽകി. പൊലീസ്​ കേസ്​ രജിസ്​റ്റർ ചെയ്​തിട്ടുണ്ട്​.

പൂജ സുൻജാർ രണ്ട് മറാത്തി സിനിമകളില്‍ നായികയായി അഭിനയിച്ചിട്ടുണ്ട്​്​. കൂടാതെ ടെലിവിഷന്‍ ഷോകളിലും സജീവമായിരുന്നു. ഗര്‍ഭിണിയായതിനെ തുടര്‍ന്ന് അഭിനയരംഗത്ത് നിന്ന് വിട്ടുനില്‍ക്കുകയായിരുന്നു.