മാവോയിസ്റ്റ് കമാൻഡർ ഹിഡ്മ കൊല്ലപ്പെട്ടത് ഏറ്റുമുട്ടലില​ല്ല; പൊലീസ് കൊലപ്പെടുത്തിയതാണെന്ന് ആക്ടിവിസ്റ്റുകൾ

റായ്പൂർ: പ്രമുഖ മാവോയിസ്റ്റ് കമാൻഡർ മാദ്‍വി ഹിഡ്മ കൊല്ലപ്പെട്ടത് പൊലീസുമായുള്ള ഏറ്റുമുട്ടലില​ല്ലെന്നും പൊലീസ് കൊലപ്പെടുത്തിയതാണെന്നും ഛത്തീസ്ഗഡിലെ ട്രൈബൽ ആക്ടിവിസ്റ്റ് സോണി ​സോരിയും മാവോയിസ്റ്റ് ബന്ധമുള്ള സാമൂഹിക സംഘടനകളും ആരോപിച്ചു.

ആന്ധ്രാപ്രദേശിൽ വച്ചാണ് ഹിഡ്മ കൊല്ലപ്പെടുന്നത്. അവിടത്തെ പൊലീസാണ് ഇദ്ദേഹം പൊലീസുമായുള്ള ഏറ്റുമുട്ടലിലാണ് മരിച്ചതെന്ന് പറഞ്ഞത്. എന്നാൽ സംഭവത്തിൽ ജുഡീഷ്യൽ അന്വേഷണം വേണമെന്ന് ഈ സംഘടനകൾ ആവശ്യപ്പെടുന്നു.

എന്നാൽ ഛത്തീസ്ഗഡ് ആഭ്യന്തര മന്ത്രി ഈ ആരോപണം നിഷേധിച്ചു. ഹിഡ്മക്ക് വീരപരിവേഷം നൽകാൻ സംഘടനകൾ ശ്രമിക്കുകയാണെന്ന് അദ്ദേഹം പറയുന്നു.

സി.പി.ഐ (എം.എൽ) സെൻട്രൽ കമ്മിറ്റി അംഗവും ദണ്ഡകാരണ്യ സ്​പെഷൽ സോൺ കമ്മിറ്റിയുടെ സെക്രട്ടറിയുമായിരുന്നു ​കൊല്ലപ്പെട്ട ഹിഡ്മ.

നവംബർ 18 നാണ് ഇദ്ദേഹവും ഭാര്യയും കൊല്ലപ്പെടുന്നത്. ഒപ്പം നാല് മാവോയിസ്റ്റുകളും കൊല്ലപ്പെട്ടു. ആന്ധ്രയി​​​ലെ അല്ലൂരി സീതാരാമ രാജു ജില്ലയിൽപെട്ട മരദുമില്ലി വനത്തിൽവച്ചാണ് ഇവർ കൊല്ലപ്പെടുന്നത്. പൊലീസിന്റെ തിരച്ചിൽ നടക്കുന്നതിനിടെ ഇവർ വെടിയുതിർക്കുകയായിരു​ന്നെന്ന് പൊലീസ് പറയുന്നു. എന്നാൽ ഇത് വ്യാജമാണെന്ന് സോണി ​സോരി ആരോപിക്കുന്നു.

കാരണം അഞ്ചു​പേർ മാത്രമായി ഇവർ സഞ്ചരിക്കാറില്ല. ഇവർ വെടിവെ​ച്ചെങ്കിൽ ഏതെങ്കിലും സെക്യൂരിറ്റി ജീവനക്കാരന് പരിക്കേൽക്കുകയില്ലായിരുന്നോ. എന്നാൽ അങ്ങനെ സംഭവിച്ചിട്ടില്ല. ഇത് ശരിക്കുള്ള ഏറ്റുമുട്ടലായിരു​ന്നെങ്കിൽ ഉറപ്പായും പരി​ക്കേൽക്കുമായിരുന്നു. ഹിഡ്മയെ പിടികൂടിയ ശേഷം പൊലീസ് വെടി​വച്ചുകൊല്ലുകയായിരുന്നെന്ന് സി.പി.ഐയുടെ മുൻ എം.എൽ.എ മനീഷ് കുഞ്ജം ആരോപിക്കുന്നു.