മോദി സർക്കാർ സമ്പൂർണ്ണ പരാജയമെന്ന്​ മൻമോഹൻ സിങ്​

ന്യൂഡല്‍ഹി: നരേന്ദ്ര മോദി സർക്കാർ സമ്പൂർണ്ണ പരാജയമാണെന്ന്​ മുൻ പ്രധാനമന്ത്രി​ മൻമോഹൻ സിങ്​. നോട്ട്​ നിരോധനം, തൊഴിൽ എന്നീ വിഷയങ്ങളിലാണ്​ മൻമോഹൻ സിങ്​ മോദിക്കെതിരെ രൂക്ഷ വിമർശനം ഉന്നയിച്ചത്​. രാജ്യത്ത്​ ഇന്ന്​ നിലനിൽക്കുന്ന സാഹചര്യം ബി.ജെ.പി സർക്കാരി​​​െൻറ പരാജയമാണ്​ ചൂണ്ടിക്കാണിക്കുന്നതെന്നും അദ്ദേഹം പറഞ്ഞു. മുൻ കേ​​ന്ദ്ര മന്ത്രിയും കോൺഗ്രസ്​ നേതാവുമായ​ കപിൽ സിബലി​​​െൻറ ‘ഷെയ്ഡ്സ് ഓഫ് ട്രൂത്ത്’ എന്ന ഗ്രന്ഥം പ്രകാശനം ചെയ്​ത്​ സംസാരിക്കവേയാണ്​ മൻമോഹൻ മോദിക്കെതിരെ ആഞ്ഞടിച്ചത്​.

യുവജനങ്ങള്‍ക്കായി രണ്ട് കോടി തൊഴിലവസരങ്ങള്‍ സൃഷ്ടിക്കുമെന്ന് പറഞ്ഞ പ്രധാനമന്ത്രി നാല് വര്‍ഷമായിട്ടും ഇത് പ്രാവര്‍ത്തികമാക്കിയിട്ടില്ലെന്ന് മൻമോഹൻ സിങ്​ പറഞ്ഞു. രാജ്യ​ത്തെ യുവാക്കൾ മോദി വാഗ്ദാനം ചെയ്ത തൊഴില്‍ അവസരങ്ങള്‍ക്കായി നിരാശരായി കാത്തിരിക്കുകയാണ്​. ഇതുമായി ബന്ധപ്പെട്ട്​ മോദി സർക്കാർ നൽകുന്ന കണക്കുകളിൽ ജനങ്ങൾക്ക്​ താൽപര്യം കുറഞ്ഞെന്നും അദ്ദേഹം വ്യക്​തമാക്കി.

രാജ്യത്ത്​ നടപ്പാക്കിയ നോട്ട്​ നിരോധനവും ജി.എസ്​.ടിയും പരാജയമായിരുന്നു. കാര്യമായ ആലോചനയില്ലാതെയാണ്​ ഇവ നടപ്പാക്കിയത്​. സംരംഭക മേഖലക്ക്​ ഇത്​ കാര്യമായ തകർച്ചയുണ്ടാക്കി. മേക്ക്​ ഇൻ ഇന്ത്യ, സ്റ്റാൻഡ്​ അപ്​ ഇന്ത്യ പോലുള്ള പദ്ധതികൾക്ക്​ ഇന്ത്യയുടെ വ്യാവസായിക മേഖലക്ക്​ കാര്യമായ സംഭാവനകൾ നൽകാൻ സാധിച്ചിട്ടില്ല. വിദേശരാജ്യങ്ങളിൽ ഉൾപ്പെടെ നിക്ഷേപിച്ചിരിക്കുന്ന കോടി കണക്കിനു ഡോളറിന്റെ കള്ളപ്പണം തിരിച്ചു കൊണ്ടുവരുന്ന കാര്യത്തിൽ മോദിസർക്കാർ പ്രത്യക്ഷമായി ഒന്നും ചെയ്​തിട്ടില്ലെന്നും മൻമോഹൻ സിങ്​ കൂട്ടിച്ചേർത്തു.​

രാജ്യത്ത്​ സ്ത്രീകളും, ദളിതരും, ന്യൂനപക്ഷങ്ങളും അരക്ഷിതാവസ്ഥയിലാണ് ജീവിക്കുന്നത്​. സംരക്ഷിക്കപ്പെടേണ്ട ജനാധിപത്യമൂല്യങ്ങളെ ക്ഷയിപ്പിക്കുന്ന നിലപാടുകളാണ്​ മോദി സർക്കാർ സ്വീകരിക്കുന്നത്​​. 2019 ലെ പൊതുതിരഞ്ഞെടുപ്പിൽ ഒരു ബദൽ ഉയർത്താൻ പ്രതിപക്ഷ കക്ഷികൾ മുന്നോട്ട്​ വരണമെന്നും അദ്ദേഹം ആവശ്യപ്പെട്ടു. ശാസ്ത്രസാങ്കേതിക രംഗത്തെ ശരിയായി അഭിസംബോധന ചെയ്യാന്‍ മോദി സര്‍ക്കാര്‍ പരാജയപ്പെട്ടെന്നും മന്‍മോഹന്‍ സിംഗ് കുറ്റപ്പെടുത്തി. മുൻ ഉപരാഷ്ട്രപതി ഹാമിദ് അൻസാരിയും ചടങ്ങിലുണ്ടായിരുന്നു.