ഇടപാടുകാർ കൈയ്യേറ്റം ചെയ്​തു; ചിട്ടിക്കമ്പനി ഉടമ ആത്മഹത്യ ചെയ്​തു

ബംഗളൂരു: ഇടപാടുകാർ പൊതുസ്​ഥലത്ത്​ വെച്ച്​ കൈയ്യേറ്റം ഴെചയ്​തതിന്​ പിന്നാലെ ധനകാര്യസ്​ഥാപന ഉടമ ആത്മഹത്യ ചെയ്​തു. തലഗട്ടപുര സ്വദേശിയായ രാജണ്ണയാണ് ദക്ഷിണ ബംഗളൂരുവിലെ യേലചനഹള്ളി ഇൻഡസ്​ട്രിയൽ ഏരിയയിലെ​ ഓഫീസിൽ ​തൂങ്ങിമരിച്ചത്​.

പണം മടക്കി നൽകാൻ ആവശ്യപ്പെട്ട്​ സമ്മർദത്തിലാക്കിയ മൂന്ന്​ പേരുടെ പേര്​ രാജണ്ണ ആത്മഹത്യ കുറിപ്പിൽ പരാമർശിച്ചിട്ടുണ്ട്​. കോവിഡ്​ മഹാമാരിയെ തുടർന്ന്​ സാമ്പത്തിക പ്രതിസന്ധി രൂക്ഷമായിരുന്നുവെന്ന്​ രാജണ്ണ ആത്മഹത്യ കുറിപ്പിൽ വിവരിക്കുന്നുണ്ട്​. ജോലിക്കാരിൽ ഒരാളാണ്​ ഓഫീസിലെ സീലിങ്​ ഫാനിൽ രാജണ്ണയെ തൂങ്ങി മരിച്ച നിലയിൽ ആദ്യം കണ്ടെത്തിയത്​.

ചിട്ടിക്കമ്പനി, പലിശക്ക്​ പണം കൊടുക്കുക, വെൽഡിങ് എന്നീ​ ബിസിനസുകൾ രാജണ്ണ ചെയ്​തിരുന്നു. കോവിഡ്​ വന്നതോടെ ആളുകൾ പണം മടക്കി നൽകാതെയായി. നഷ്​ടം നേരിട്ട്​ സാമ്പത്തിക പ്രതിസന്ധിയിലായതോടെ​ സുഹൃത്തുക്കളിൽ നിന്ന്​ കടം വാങ്ങിത്തുടങ്ങി. ചിട്ടിക്കമ്പനിയിൽ പണം നിക്ഷേപിച്ചവർ പണം തിരികെ ചോദിച്ചതോടെയാണ്​ പ്രശ്​നങ്ങൾ വഷളായത്​.

പണം ലഭിക്കാതെ വന്നതോ​െട നിക്ഷേപകർ സെൻട്രൽ ക്രൈംബ്രാഞ്ചിനെ സമീപിച്ചു. പണം നൽകിയതായി കാണിക്കുന്ന രേഖകൾ ഇല്ലാത്തതിനാൽ വിഷയത്തിൽ ഇടപെടാനാകില്ലെന്ന്​ അവർ പറഞ്ഞു. ഇതോടെയാണ്​ മൂന്ന്​ നിക്ഷേപകർ പൊതുമധ്യത്തിൽ വെച്ച രാജണ്ണയെ അപമാനിക്കുകയും കൈയ്യേറ്റം ചെയ്യുകയും ചെയ്​തത്​. ഇതിൽ രാജണ്ണ അതീവ ദുഖിതനായിരുന്നുവെന്ന്​ ഭാര്യ പറഞ്ഞു. മൂന്ന്​ നിക്ഷേപകർക്കെതിരെ കുമാരസ്വാമി ലേഔട്ട്​ പൊലീസ്​ കേസ്​ എടുത്തു.