സ്വന്തം പരീക്ഷ എഴുതിയത്​ മറ്റൊരാൾ; എം.ബി.ബി.എസ്​ ബിരുദധാരി ഡൽഹിയിൽ പിടിയിൽ

ന്യൂഡൽഹി: താജികിസ്​താനിൽ എം.ബി.ബി.എസ്​ ബിരുദ പഠനം പൂർത്തിയാക്കിയയാൾ ഇന്ത്യയിൽ പ്രാക്​ടീസ്​ നടത്താൻ ആവശ്യമായ​ ഫോറിൻ മെഡിക്കൽ ഗ്രാജ്വേറ്റ്​സ്​ പരീക്ഷ (എഫ്​.എം.ജി.ഇ) മറ്റൊരാളെ കൊണ്ട്​ എഴുതിച്ചതിന്​ അറസ്റ്റിൽ. രാജസ്​ഥാനിലെ പാലി സ്വദേശി മനോഹർ സിങ്ങാണ്​ പിടിയിലായത്​.

കേന്ദ്ര ആരോഗ്യ, കുടുംബക്ഷേമ മന്ത്രാലയത്തിനു കീഴിലെ ദേശീയ പരീക്ഷ ബോർഡ്​ (എൻ.ബി.ഇ) നടത്തുന്ന എഫ്​.എം.ജി.ഇക്ക്​ മനോഹർ സിങ്​ സ്വ​ന്തം പേര്​ രജിസ്റ്റർ ചെയ്​തിരുന്നു. വിദേശത്തുജീവിക്കുന്ന ഇന്ത്യൻ പൗരന്മാർ മറ്റു യൂനിവേഴ്​സിറ്റികളിൽ പഠനം പൂർത്തിയാക്കിയാൽ ഇന്ത്യയിൽ സേവനത്തിന്​ ഈ പരീക്ഷ നിർബന്ധമായും വിജയകരമായി പൂർത്തിയാക്കണം. 2020 ഡിസംബർ നാലിനാണ്​ അവസാനമായി പരീക്ഷ നടന്നത്.​ ഡൽഹി മഥുര റോഡിലായിരുന്നു​ പരീക്ഷ കേന്ദ്രം​.

പരീക്ഷ കേന്ദ്രത്തിൽ എടുത്ത ഫോ​ട്ടോയും അപേക്ഷ ഫോമിലെ ഫോ​ട്ടോയും തമ്മിലെ വ്യത്യാസം കണ്ട്​ ഫലം തടഞ്ഞുവെച്ചതായിരുന്നു. ചോദ്യം ചെയ്യലിൽ പരസ്​പര വിരുദ്ധമായ വിശദീകരണം നൽകിയതോടെ പൊലീസ്​ സ്​റ്റേഷനിലേക്ക്​ കൊണ്ടുപോയി. അറസ്റ്റ്​ ചെയ്​ത മനോഹർ സിങ്ങിന്‍റെ അഡ്​മിറ്റ്​ കാർഡ്​, എം.ബി.ബി.എസ്​ ബിരുദം, അപേക്ഷാ ഫോം എന്നിവയും കസ്റ്റഡിയിലെടുത്തിട്ടുണ്ട്​.

കഴിഞ്ഞ ആറു വർഷമായി ഈ പരീക്ഷ കടമ്പ കടക്കാനാവാതെ കുഴയുകയാണെന്നും ഒടുവിൽ മറ്റൊരാളെ വെച്ച്​ പരീക്ഷ എഴുതിക്കുകയായിരുന്നുവെന്നും ഇയാൾ മൊഴി നൽകി. നാലു ലക്ഷം രൂപ നൽകാമെന്ന വ്യവസ്​ഥയിൽ ഒരു ഡോക്​ടറാണ്​ പരീക്ഷ എഴുതിയത്​. ഇയാളെ കണ്ടെത്താനായി തിരച്ചിൽ തുടരുകയാണ്​.