പെൺകുട്ടിയെ ഉപ​പ്രദവിച്ച 28കാരന്​ ബന്ധുക്കളുടെ ക്രൂരമർദനം; മൂന്നുപേർ ഒളിവിൽ

ഭോപാൽ: മധ്യപ്രദേശിൽ പെൺകുട്ടിയെ ഉപദ്രവിച്ച​ യുവാവിന്​ ബന്ധുക്കളുടെ ക്രൂരമർദനം. യുവാവിനെ അസഭ്യം പറയുകയും ക്രൂരമായി മർദിക്കുകയും ചെയ്യുന്ന ദൃശ്യങ്ങൾ പുറത്ത്​. മധ്യപ്രദേശിലെ രേവ ജില്ലയിലാണ്​ സംഭവം. ദൃശ്യങ്ങൾ വൈറലായതോടെ മൂന്നുപേർക്കെതിരെ ​കേസെടുത്തതായി പൊലീസ്​ അറിയിച്ചു.

28കാരനായ ബൽദൗ ജാദവിനാണ്​ മർദനമേറ്റത്​. പെൺകുട്ടിയെ ഉപദ്രവിച്ചുവെന്ന്​ ആരോപിച്ചാണ്​ മർദനം. പെൺകുട്ടിയുടെ ബന്ധുക്കളായ മൂന്നുപേരാണ്​ ആക്രമണത്തിന്​ പിന്നി​െലന്നു​ം പൊലീസ്​ പറഞ്ഞു. അക്രമം നടത്തിയ മൂന്നുപേരും ഒളിവിലാണെന്നും ഇവരെ പിടികൂടാൻ തിരച്ചിൽ ആരംഭിച്ചതായും പൊലീസ്​ അറിയിച്ചു.

വിഡിയോയിൽ ബൽദൗവിന്‍റെ കഴുത്തിൽ ബെൽറ്റ്​ മുറുക്കിയ ശേഷം ഒരാൾ വലിക്കുന്നത്​ കാണാം. മറ്റൊരാൾ വടികൊണ്ട്​ അടിക്കുന്നതും നിലത്തുകിടക്കുന്ന ബൽദൗവിനെ ചവിട്ടുന്നതും വിഡിയോയിലുണ്ട്​.

മൂന്നാമത്തെയാളാണ്​ വിഡിയോ പകർത്തുന്നത്​. ഇതിൽ ആക്രമണം നിർത്താനും ഇനിയും മർദിച്ചാൽ ബൽദൗ മരിച്ചുപോകുമെന്നും പറയുന്നതുകേൾക്കാം. എന്നാൽ വീണ്ടും ബൽദൗവിനെതിരെ ക്രൂരമർദനം തുടരുകയായിരുന്നു.

ബൽദൗ കവർച്ചകേസിൽ ജയിലിൽ കഴിയുകയായിരുന്നുവെന്നും അടുത്തിടെയാണ്​ പുറത്തിറങ്ങിയതെന്നും അഡീഷനൽ സൂപ്രണ്ട്​ ശിവകുമാർ വർമ പറഞ്ഞു. പുറത്തിറങ്ങിയ ശേഷം ബൽദൗ ഒരു​ പെൺകുട്ടിയെ ഉപദ്രവിച്ചിരുന്നു. പെൺകുട്ടിയുടെ ബന്ധുക്കളാണ്​ ഇയാളെ ക്രൂരമായി മർദിക്കുന്നത്​. സംഭവത്തിൽ പ്രതികൾക്കെതിരെ കേസെടുത്തതായും അന്വേഷണം ശക്തമാക്കിയ​തായും അദ്ദേഹം കൂട്ടിച്ചേർത്തു.