കോവിഡ് ബാധിച്ച് മരിച്ച ഭാര്യയുടെ മൃതദേഹം ആശുപത്രിയിൽനിന്ന്​ കടത്തിയ യുവാവ് പിടിയിൽ

ഔറംഗാബാദ്​: കുടുംബാംഗങ്ങളെ പ​ങ്കെടുപ്പിച്ച്​ അന്ത്യകർമ്മങ്ങൾ നടത്തുന്നതിന്​ വേണ്ടി കോവിഡ് ബാധിച്ച് മരിച്ച ഭാര്യയുടെ മൃതദേഹം യുവാവ് ആശുപത്രിയിൽനിന്ന് കടത്തി. ആശുപത്രി അധികൃതർ പരാതി നൽകിയതിനെ തുടർന്ന്​ പൊലീസ് യുവാവിനെയും സഹായികളായ മൂന്നുപേരെയും പിടികൂടി. മൃതദേഹം തിരികെ ആശുപത്രിയിലെത്തിച്ചു.

മഹാരാഷ്​ട്രയിലെ ബീഡ് ജില്ലയിലാണ് ആശുപത്രി അധികൃതരെയും പൊലീസിനെയും മണിക്കൂറുകളോളം മുൾമുനയിലാക്കിയ സംഭവമുണ്ടായത്. ഗെവ്റായി താലൂക്ക്​ സ്വദേശിയായ 38കാരനാണ് ഭാര്യയുടെ മൃതദേഹം കോവിഡ് ആശുപത്രിയിൽനിന്ന് കടത്തിയത്. ഏപ്രിൽ 23നാണ് ഇയാളുടെ ഭാര്യയെ കോവിഡ് ബാധിച്ച് ആശുപത്രിയിൽ പ്രവേശിപ്പിച്ചത്. ചികിത്സയിലിരിക്കെ തിങ്കളാഴ്ച രാവിലെ യുവതി മരിച്ചു.

തുടർന്ന് കോവിഡ് പ്രോട്ടോ​േകാൾ പാലിച്ച് മൃതദേഹം സംസ്കരിക്കാനുള്ള തയ്യാറെടുപ്പുകൾക്ക്​ ആശുപത്രി അധികൃതർ തുടക്കമിടുന്നതിനിടെയാണ്​ യുവതിയുടെ ഭർത്താവ് തടസ്സവുമായി രംഗത്തെത്തിയത്​. മൃതദേഹം വീട്ടുകാർക്ക് വിട്ടുതരണമെന്നും നാട്ടിലെത്തിച്ച് കുടുംബാംഗങ്ങളെ പ​ങ്കെടുപ്പിച്ച്​ സംസ്കരിക്കണമെന്നുമാണ്​ ഇയാൾ ആവശ്യമുന്നയിച്ചത്​. രണ്ട് ദിവസം മുമ്പ് നടത്തിയ ആന്‍റിജെൻ ടെസ്റ്റിൽ ഭാര്യ നെഗറ്റീവാണെന്നതാണ്​ മൃതദേഹം വിട്ടുനൽകുന്നതിനുള്ള കാരണമായി ഇയാൾ ചൂണ്ടിക്കാട്ടിയത്​.

എന്നാൽ, കോവിഡ് പ്രോട്ടോകോൾ പ്രകാരം മൃതദേഹം നാട്ടിൽ സംസ്കരിക്കാനാകില്ലെന്ന്​ആശുപത്രി അധികൃതർ നിലപാടെടുത്തു. തുടർന്ന് ആശുപത്രി ജീവനക്കാർ ജോലിത്തിരക്കിലായതോടെ യുവാവ് മൂന്ന്​ ബന്ധുക്കളുടെ സഹായത്തോടെ ഭാര്യയുടെ മൃതദേഹം ആശുപത്രിയിൽനിന്ന് കടത്തുകയായിരുന്നു. മോർച്ചറിയിലേക്ക് മാറ്റാനായി ജീവനക്കാരൻ വാർഡിൽ എത്തിയപ്പോഴാണ് മൃതദേഹം കാണാനില്ലെന്ന്​ വിവരം അറിയുന്നത്​. തുടർന്ന് ആശുപത്രി അധികൃതർക്കുവേണ്ടി അർച്ചന പിങ്ക്​ലെ എന്ന നഴ്​സ്​ പൊലീസിൽ പരാതി നൽകുകയായിരുന്നു. പൊലീസ് ഒരുമണിക്കൂറിനുള്ളിൽതന്നെ യുവാവിനെയും ബന്ധുക്കളെയും കണ്ടെത്തി മൃതദേഹം വീണ്ടെടുത്ത്​ ആശുപത്രിയിൽ തിരികെ എത്തിച്ചു. ഇവർക്കെതിരേ പകർച്ചവ്യാധി നിയമപ്രകാരം കേസെടുത്തതായി പൊലീസ് പറഞ്ഞു.