പണച്ചെലവ്​ സംബന്ധിച്ച തർക്കം; യുവാവിൻെറ ജനനേന്ദ്രിയത്തിൽ സാനിറ്റൈസർ തളിച്ച്​ തൊ​ഴിലുടമ

പുണെ: മഹാരാഷ്​ട്രയിൽ യുവാവിന്​ തൊഴിലുടമയുടെ കൊടിയ പീഡനം. സ്വകാര്യ കമ്പനിയിലെ 30കാരനായ മാനേജരെയാണ്​ തൊഴിലുടമയും സഹായികളും ചേർന്ന്​ മർദിക്കുകയും ജനനേന്ദ്രിയത്തിൽ സാനിറ്റൈസർ തളിക്കുകയും ചെയ്​തത്​. സാമ്പത്തിക തർക്കത്തെ തുടർന്ന്​ മഹാരാഷ്​ട്രയിലെ കൊത്രുദിലായിരുന്നു സംഭവം. ജൂൺ 13,14 തീയതികളിൽ യുവാവ്​ ജോലി ചെയ്യുന്ന കമ്പനി ഓഫീസിൽ വെച്ചാണ്​ മർദനമുണ്ടായത്. സംഭവത്തിൽ കേസെടുത്തത്​ ജൂലൈ രണ്ടിനാണ്​. 

ഔദ്യോഗികാവശ്യത്തിനായി യുവാവ് കഴിഞ്ഞ മാർച്ചിൽ​ ഡൽഹിയിൽ പോയിരുന്നു. എന്നാൽ ലോക്​ഡൗൺ പ്രഖ്യാപിച്ചതോടെ യുവാവ്​ അവിടെ കുടുങ്ങുകയും ചെയ്​തു. ഡൽഹിയിൽ ഒരു ലോഡ്​ജിൽ താമസിച്ച ജീവനക്കാരൻ ഇതിനിടെ കമ്പനി നൽകിയ പണം മു​​ഴുവൻ ചെലവ​ഴിച്ചു.  

മെയ്​ ഏഴിന്​ പുണെയിൽ തിരിച്ചെത്തിയ ജീവനക്കാരനോട്​ തൊഴിലുടമ ഒരു ഹോട്ടലിൽ 17 ദിവസം ക്വാറൻറീനിൽ കഴിയാൻ നിർദേശിച്ചു. എന്നാൽ ബില്ലടക്കാൻ കൈയിൽ പണമില്ലാതായതോടെ ഹോട്ടൽമുറി ഒഴിഞ്ഞു നൽകുന്നതിന്​ മുമ്പ് യുവാവിന്​​ തൻെറ ഫോണും ഡെബിറ്റ്​ കാർഡും പണയം വെക്കേണ്ടി വന്നു.

ജൂൺ 13ന്​ കമ്പനി ഉടമയും സഹായികളും ജീവനക്കാരനോട്​ അയാൾ ഡൽഹിയിൽ ചെലവഴിച്ച തുക തിരികെ നൽകണമെന്ന്​ ആവശ്യപ്പെട്ടു. വഴങ്ങാതായപ്പോൾ ഇയാളെ കാറിലിട്ട്​ ഓഫീസിലെത്തിച്ചു. തൊഴിലുടമയും മറ്റ്​ രണ്ട്​ പേരും ചേർന്ന്​ യുവാവിനെ മർദിക്കുകയും അയാളുടെ രഹസ്യ ഭാഗങ്ങളിൽ സാനിറ്റൈസർ ചൊരിയുകയുമായിരുന്നുവെന്ന്​ പൊലീസ്​ പറഞ്ഞു. 

മർദനത്തിനൊടുവിൽ വിട്ടയക്കപ്പെട്ട ജീവനക്കാരൻ പിന്നീട്​ സ്വകാര്യ ആശുപത്രിയിൽ ചികിത്സ തേടി.  വ്യാഴാഴ്​ചയാണ്​ കേസിൽ എഫ്​. ഐ.ആർ രജിസ്​റ്റർ ചെയ്​തത്​ . സംഭവത്തിൽ കൂടുതൽ അന്വേഷണം നടന്നുവരികയാണ്​.