ഭാര്യയുടെ അറുത്തെടുത്ത തലയുമായി യുവാവ്; പൊലീസ്​ പിടിക്കാനെത്തിയപ്പോൾ ദേശീയ ഗാനാലാപനം

ലക്​നോ: കുടുംബ വഴക്കിനെ തുടർന്ന്​ ഭാര്യയെ കൊന്ന്​ തലയറുത്ത്​ യുവാവ് പോലീസില്‍ കീഴടങ്ങി. ഉത്തര്‍പ്രദേശിലെ ബരാബങ്കിയിൽ ജഹാങ്കിരബാദ്​ പൊലീസ്​ സ്​റ്റേഷൻ പരിധിയിൽ​പ്പെട്ട ബഹാദൂർപുർ ​ഗ്രാമത്തിൽ ശനിയാഴ്​ചയാണ് സംഭവം.

30കാരനായ അഖിലേഷ് റാവത്താണ് ഭാര്യയെ കൊന്ന ശേഷം അറുത്തെടുത്ത തലയുമായി പൊലീസ്​ സ്​റ്റേഷനിലേക്ക്​ നടന്നുപോയത്​. പൊലീസ്​ പിടികൂടാനെത്തിയപ്പോൾ ദേശീയഗാനം ആലപിച്ച്​ തടസ്സപ്പെടുത്താൻ ശ്രമിച്ച ഇയാൾ ‘ഭാരത്​ മാതാ കീ ജയ്​’ എന്ന്​ മുദ്രാവാക്യവും മുഴക്കി. തുടർന്ന്​ മൽപ്പിടിത്തത്തിന്​ ശേഷമാണ്​ പൊലീസ്​ യുവതിയുടെ തല പിടിച്ചുവാങ്ങിയത്​.

ശനിയാഴ്ച ഉച്ചയ്ക്ക് അഖിലേഷും ഭാര്യയും തമ്മിലുണ്ടായ കുടുംബവഴക്കാണ്​ കൊലപാതകത്തിൽ കലാശിച്ചതെന്ന്​ എസ്​.പി അരവിന്ദ്​ ചതുർവേദി പറഞ്ഞു. തുടര്‍ന്ന് അറുത്തെടുത്ത തലയുമായി കീഴടങ്ങാൻ അയാൾ പൊലീസ്​ സ്​റ്റേഷനിലേക്ക്​ നടക്കുകയായിരുന്നു. ഇതുകണ്ട്​ ഭയചകിതരായ നാട്ടുകാർ വിവരമറിയിച്ചതനുസരിച്ചാണ്​​ പൊലീസ്​ എത്തിയത്​. കേസെടുത്തെന്നും കൂടുതൽ അന്വേഷണം നടത്തി വരികയാണെന്നും എസ്​.പി എസ്​.പി. അരവിന്ദ്​ ചതുർവേദി പറഞ്ഞു.