ബെഡ്​ഷീറ്റിൽ പൊതിഞ്ഞ്​ മകളുടെ മൃതദേഹം തോളിലേറ്റി ശ്​മശാനത്തിലേക്ക്​ നടന്ന്​ ആ പിതാവ്​

ജലന്ധർ: 11കാരിയായ മകളുടെ മൃതദേഹം സംസ്​കരിക്കാൻ ബെഡ്​ഷീറ്റിൽ പൊതിഞ്ഞ്​ തോളിലേറ്റി ശ്​മശാനത്തിലേക്ക്​ നടന്നുപോകുന്ന ലോകത്തെ ഏറ്റവും ദൗർഭാഗ്യവാന്മാരിൽ ഒരാളായ ആ പിതാവിന്‍റെ വിഡിയോ കഴിഞ്ഞയാഴ്ച സമൂഹ മാധ്യമങ്ങളിൽ ചർച്ചയായിരുന്നു. ജലന്ധറിലെ റാംനഗറിൽ നിന്നുള്ള വിഡിയോ വിവാദമായതോടെ ഡെപ്യൂട്ടി കമ്മീഷണർ ഘനശ്യാം തോരി അന്വേഷണം പ്രഖ്യാപിച്ചിരിക്കുകയാണ്​. തന്‍റെ മകൾ കോവിഡ്​ ബാധിച്ച്​ മരിച്ചുവെന്നാണ്​ ആ പിതാവ്​ പറയുന്നത്​. ആശുപത്രി അധികൃതർ കുട്ടി കോവിഡ്​ ബാധിച്ചാണ്​ മരിച്ചതെന്ന്​ അദ്ദേഹത്തെ അറിയിച്ചിരുന്നു. എന്നാൽ, കുട്ടിക്ക്​ കോവിഡ്​ ഇല്ലായിരുന്നെന്നാണ്​ ജില്ലാ ഭരണകൂടം ഇപ്പോൾ പറയുന്നത്​.

കഴിഞ്ഞ ഞായറാഴ്ച അമൃത്​സറിലെ ആശുപത്രിയിൽ ചികിത്സയിലിരിക്കെയാണ്​ സോനു എന്ന 11കാരി മരിക്കുന്നത്​. തിങ്കളാഴ്​ച മകനെയും കൂട്ടി സോനുവിന്‍റെ മൃതദേഹവുമായി ശ്​മശാനത്തിലേക്ക്​ നടക്കുന്ന പിതാവ്​ ദിലീപിന്‍റെ വിഡിയോ ആണ്​ സമൂഹ മാധ്യമങ്ങളിൽ വൈറലായത്​. മകൾക്ക്​ രണ്ട്​ മാസ​ത്തോളമായി ദഹനക്കേട്​ ഉണ്ടായിരുന്നെന്നും അങ്ങിനെയാണ്​ അമൃത്​സറിലെ ആശുപത്രിയിൽ​ പ്രവേശിപ്പിച്ചതെന്നും ദിലീപ്​ പറയുന്നു. ഞായറാഴ്ച അവൾ മരിച്ചു. കോവിഡ്​ പരി​ശോധനഫലം പോസിറ്റിവ്​ ആണെന്ന്​ ഡോക്​ടർമാരും പറഞ്ഞു. എന്നിട്ടും ഒരു ബെഡ്​ഷീറ്റിൽ പൊതിഞ്ഞാണ്​ മൃതദേഹം കൊടുത്തുവിട്ടത്​.

'ഞാൻ നിരക്ഷരനാണ്​, ദരിദ്രനാണ്​. ​എനിക്ക്​ കോവിഡ്​ പ്രോ​​ട്ടോ​കോൾ ഒന്നും അറിയില്ല. എനിക്ക്​ ഏരിയ കൗൺസില​റെയോ എം.എൽ.എയെയോ ബന്ധപ്പെടാനൊന്നും സമയ​മോ അറിവോ ഉണ്ടായിരുന്നില്ല. കോവിഡ്​ സർട്ടിഫിക്കറ്റ്​ നൽകിയതിനാൽ അയൽവാസികളാരും ഞങ്ങളെ സഹായിച്ചുമില്ല. അമൃത്​സർ ആശുപത്രിയിലെ ഒരു ക്ലാസ്​ ​ഫോർ ജീവനക്കാരൻ ആണ്​ മൃതദേഹം ബെഡ്​ഷീറ്റിൽ പൊതിഞ്ഞ്​ നൽകിയത്​. പി.പി.ഇ കിറ്റ്​ ഒന്നും നൽകിയില്ല. മരണസർട്ടിഫിക്കറ്റ്​ മാത്രമാണ്​ നൽകിയത്​. ഒരു സംരക്ഷണ മാർഗങ്ങളുമില്ലാതെയാണ്​ മൃതദേഹം ശ്​മാശനത്തിലേക്ക്​ കൊണ്ടുപോയതും സംസ്​കരിച്ചതും. ആയിരം രൂപ ഒരാളിൽ നിന്ന്​ കടം വാങ്ങിയാണ്​ ഞാൻ മൃതദേഹം ദഹിപ്പിക്കുന്നതിന്​ ആവശ്യമായ വിറകും മറ്റും വാങ്ങിയത്​'- ദിലീപ്​ പറയുന്നു.

അതേസമയം, സബ്​ ഡിവിഷണൽ മജിസ്​ട്രേറ്റിന്‍റെ റിപ്പോർട്ട്​ അനുസരിച്ച്​ ഈ കുട്ടി മരിച്ചത്​ കോവിഡ്​ ബാധിച്ച്​ അല്ലയെന്ന്​ ഡെപ്യൂട്ടി കമ്മീഷണർ ഘനശ്യാം തോരി പറയുന്നു​. ജലന്ധർ സിവിൽ ഹോസ്​പിറ്റലിൽ നിന്നാണ്​ പെൺകുട്ടിയെ അമൃത്​സർ മെഡിക്കൽ കോളജിലേക്ക്​ മാറ്റിയത്​. ആംബുലൻസിലാണ്​ കൊണ്ടുപോയത്​. മരിച്ചുകഴിഞ്ഞ്​ മൃതദേഹം ഇവരുടെ വീട്ടിലെത്തിച്ചതും ആംബുലൻസിലാണെന്നും അദ്ദേഹം പറഞ്ഞു.

മൃതദേഹം സംസ്​കരിക്കുന്നതിന്​ ദിലീപിന്‍റെ വീട്ടിൽ നിന്ന്​ ആരും സഹായം അഭ്യർഥിച്ചില്ലെന്ന്​ കോവിഡ്​ പേഷ്യന്‍റ്​ ട്രാക്കിങ്​ ഓഫിസർ ആയ നവനീത്​ കൗർ ബാൽ പറയുന്നു. എന്തായാലും ഇത്തരം ദാരുണ ദൃശ്യങ്ങൾ തുടർക്കാ​ഴ്ചയാകുകയാണ്​ മഹാമാരിയുടെ ഈ രണ്ടാം തരംഗത്തിൽ. ഹിമാചല്‍ പ്രദേശില്‍ നിന്ന്​ അമ്മയുടെ മൃതദേഹവും ചുമലിലേറ്റി ശ്മശാനത്തിലേക്ക് പോകുന്ന മകന്‍റെ വിഡിയോ പുറത്തുവന്നിരുന്നു. കാറിന്​ മുകളിൽ വെച്ച്​ കെട്ടിയും സ്​കൂട്ടറിൽ ഇരുത്തിയുമൊക്കെ മൃതദേഹങ്ങൾ കൊണ്ടുപോകുന്നത്​ സർവസാധാരണമാണിപ്പോൾ.