കലാപകാരികൾ തീയിട്ട അയൽവീട്ടുകാരെ രക്ഷിക്കുന്നതിനിടെ യുവാവിന്​ പൊള്ളലേറ്റു

ന്യൂ ഡൽഹി: കലാപകാരികൾ തീയിട്ട അയല്‍വീട്ടിലെ ആറംഗ മുസ്‌ലിം കുടുംബത്തെ രക്ഷിക്കുന്നതിനിടെ യുവാവിന്​ ഗുരുതരമാ യി പൊള്ളലേറ്റു. കലാപകാരികള്‍ പെട്രോള്‍ ബോംബ് എറിഞ്ഞ്​ കത്തിച്ച വീട്ടിൽ രക്ഷാപ്രവർത്തനത്തിനിറങ്ങിയ പ്രേംകാ ന്ത് ബാഗേല്‍ എന്ന യുവാവിനാണ്​ 70 ശതമാനത്തോളം പൊള്ളലേറ്റത്​.

വീട്ടിലെ പ്രായമുള്ള അമ്മയെ രക്ഷിക്കുന്നതിനിടയിലാണ്​ പ്രേംകാന്തിന് പരിക്കേറ്റത്​. ഇദ്ദേഹത്തെ ആശുപത്രിയില്‍ എത്തിക്കാന്‍ വാഹനങ്ങള്‍ ഒന്നും ലഭിച്ചില്ല. ഒരു രാത്രി മുഴുവന്‍ പൊള്ളലേറ്റ ശരീരവുമായി വീട്ടില്‍ തന്നെ കഴിച്ച് കൂട്ടേണ്ടി വന്നു. രാവിലെ ജി.ടിബി ആശുപത്രിയില്‍ പ്രവേശിപ്പിച്ച പ്രേംകാന്തിന്‍റെ ജീവന്‍ രക്ഷിക്കാനുള്ള ശ്രമത്തിലാണ് ഡോക്ടര്‍മാര്‍.

ശിവ് വിഹാറില്‍ ഹിന്ദു-മുസ്‍ലിം സമുദായങ്ങള്‍ ഐക്യത്തോടെയാണ് ജീവിക്കുന്നതെങ്കിലും കലാപം മറ്റൊരു രീതിയിലേക്കാണ് തങ്ങളെ കൊണ്ടുപോയതെന്ന് പ്രേംകാന്ത് പറയുന്നു. അക്രമത്തിനിരയായവരെ പിന്തുണച്ച് ഡല്‍ഹിയില്‍ ജാതിമത ഭേദമന്യേ നിരവധി പേര്‍ രംഗത്തുവന്നിരുന്നു. വീടുകളില്‍ നിന്ന് പലായനം ചെയ്യാന്‍ നിര്‍ബന്ധിതരായ മുസ്‌ലിം കുടുംബങ്ങള്‍ക്ക് ഡല്‍ഹിയിലെ ഗുരുദ്വാരകള്‍ തുറന്നു​കൊടുത്തിരുന്നു.