യു.പിയില്‍ ഇരട്ടക്കൊല കേസ്​ പ്രതിയെ കോടതി മുറിക്കുള്ളിൽ വെടിവച്ച് കൊന്നു

ലഖ്​നോ: ഉത്തർപ്രദേശിൽ ഇരട്ടകൊലപാതക കേസിലെ പ്രതിയെ വിചാരണക്കിടെ കോടതി മുറിക്കുള്ളിൽ വെടിവച്ചു കൊന്നു. ബിജ്‌നോറിലെ ചീഫ് ജുഡീഷ്യൻ മജിസ്ട്രേറ്റ് കോടതിയിലാണ് സംഭവം.

ബി.എസ്​.പി നേതാവ്​ ഹാജി ഇഹ്​സാനെയും അനന്തരവനെയും കൊന്ന കേസിലെ പ്രതി ഷാനവാസ് അൻസാരിയാണ് മരിച്ചത്. ഷാനവാസിൻെറ കൂട്ടു പ്രതിക്കും മനീഷ്​ കുമാർ എന്ന പൊലീസ്​ കോൺസ്​റ്റബിളിനും വെടിവെപ്പിൽ പരിക്കുണ്ട്​. ഇവരെ ആശുപത്രിയിൽ പ്രവേശിപ്പിച്ചു. സംഭവത്തിൽ ഹാജി ഇഹ്​സാൻെറ മകനടക്കം മൂന്നു പേരെ പൊലീസ് അറസ്റ്റ് ചെയ്തു.

കോടതി നടപടികൾ പ​ുരോഗമിക്കുന്നതിനിടെ മൂന്നുപേർ എഴുന്നേറ്റ്​ തുരുതുരെ വെടിവെക്കുകയായിരുന്നു. ഷാനവാസിൻെറ ദേഹത്ത്​ പത്ത്​ ബുള്ളറ്റുകൾ തുളച്ചുകയറി. ചീഫ് ജുഡീഷ്യൻ മജിസ്ട്രേറ്റ് തലനാരിഴക്ക്​ രക്ഷപ്പെടുകയായിരുന്നെന്ന്​ ദൃക്​സാക്ഷികൾ പറയുന്നു. വെടിയുതിർന്ന ഉടൻ തന്നെ കോടതിമുറിക്കുള്ളിൽ ഉണ്ടായിരുന്ന ജഡ്ജി ഉൾപ്പെടെയുള്ളവർ തറയിൽ കമിഴ്ന്നു കിടന്നു.
വെടിവെച്ച ശേഷം ഓടിരക്ഷപ്പെടാൻ ശ്രമിച്ചവരെ പൊലീസ് പിന്തുടർന്നു പിടികൂടുകയായിരുന്നെന്ന്​ ബിജ്​നോർ എസ്​.പി. സഞ്​ജീവ്​ ത്യാഗി പറഞ്ഞു.

നജീബബാദിൻെറ ചുമതലയുണ്ടായിരുന്ന ബി.എസ്.പി നേതാവ് ഹാജി ഇഹ്സാൻ ഖാൻ, അന്തരവൻ ഷബാദ്​ എന്നിവർ മേയ്​ 28നാണ്​ ഓഫിസ്​ മുറിക്കുള്ളിൽവെച്ച്​ കൊല്ലപ്പെട്ടത്​. രാഷ്​ട്രീയമല്ല, സ്​ഥലമിടപാടുമായി ബന്ധപ്പെട്ട തർക്കമാണ്​ കൊലപാതകത്തിന്​ കാരണമെന്ന്​ അന്നേ പൊലീസ്​ വ്യക്​തമാക്കിയിരുന്നു. വെടിവെച്ച വാടക കൊലയാളി അബ്​ദുൽ ഖാനെ (19) ദിവസങ്ങൾക്കകം ഡൽഹിയിൽ വെച്ച്​ പൊലീസ്​ പിടികൂടിയതോടെയാണ്​ ഷാനവാസ്​ അൻസാരി അടക്കമുള്ളവർ കുടുങ്ങിയത്​.

2017 ഏപ്രിലിലും ഇതേ കോടതിയിൽ വിചാരണത്തടവുകാരനെ വെടിവെച്ച്​ കൊന്നിരുന്നു. വിചാരണക്കായി​ കൊണ്ടുവരു​േമ്പാൾ നീരജ്​ ബവാന സംഘത്തിൽപ്പെട്ട കൊല​ക്കേസ്​ പ്രതിയെയാണ്​ കോടതി വളപ്പിൽ വെച്ച്​ വെടിവെച്ച്​ കൊന്നത്​.