കമ്യൂണിസ്റ്റ്​ കുടുംബത്തിലെ സോഷ്യലിസം മമത ബാനർജിയെ വിവാഹം ചെയ്യും; കമ്യൂണിസവും ലെനിനിസവും പ​ങ്കെടുക്കും

ചെന്നൈ: തമിഴ്​നാട്​ സേലത്ത്​ സോഷ്യലിസം മമത ബാനർജിയെ വിവാഹം ചെയ്യും. ഞായറാഴ്ച നടക്കാനിരിക്കുന്ന വിവാഹത്തിന്‍റെ ക്ഷണക്കത്ത്​ വൈറലാ​യതോടെ ഒരു നഗരം മുഴുവൻ ഇപ്പോൾ ഈ വിവാഹത്തെക്കുറിച്ചാണ്​ ചർച്ച.

സേലത്ത്​ ഞായറാഴ്ച നടക്കാനിരിക്കുന്ന വിവാഹത്തിലെ വരന്‍റെ പേരാണ്​ 'സോഷ്യലിസം'. വധുവിന്‍റെ പേര്​ 'മമത ബാനർജി'.

കമ്യൂണിസ്റ്റ്​ പാർട്ടി ഒാഫ്​ ഇന്ത്യ (സി.പി.ഐ) സേലം സെക്രട്ടറി എ. മോഹന്‍റെ മൂന്നാമത്തെ മകനാണ്​ സോഷ്യലിസം. കമ്യൂണിസം, ലെനിനിസം എന്നിങ്ങനെയാണ്​ മൂത്തമക്കളു​െട പേര്​. കമ്യൂണിസ്റ്റ്​ കുടുംബമായതിനാലാണ്​ മക്കൾക്ക്​ ഈ പേരുകൾ നൽകിയതെന്ന്​ മോഹൻ പറയുന്നു. 2016ലെ തെരഞ്ഞെടുപ്പിൽ വീരപാണ്ഡി മണ്ഡലത്തിലെ സ്​ഥാനാർഥിയായിരുന്നു മോഹൻ.

മക്കൾ ഉൾപ്പെടെ മോഹന്‍റെ കുടുംബം കടുത്ത കമ്യൂണിസ്റ്റ്​ അനുഭാവികളാണെങ്കിലും സോഷ്യലിസം വിവാഹം കഴിക്കാൻ പോകുന്ന പെൺകുട്ടിയുടെ കുടുംബം കോൺഗ്രസ്​ അനുഭാവികളാണ്​. പശ്ചിമ ബംഗാൾ മുഖ്യമന്ത്രി മമത ബാനർജിയുടെ പേരാണ്​ വധുവിന്​. മമത ബാനർജി നേരത്തേ കോൺഗ്രസുകാരിയായിരുന്നു. അതിനാലാണ്​ ആ പേര്​ മകൾക്കിടാൻ കാരണമായതെന്ന്​ വധുവിന്‍റെ കുടുംബവും പറയുന്നു.

പേരുകൾകൊണ്ട്​ വ്യത്യസ്​തമായവരുടെ വിവാഹക്ഷണക്കത്ത്​ വൈറലാണ്​ ഇപ്പോൾ സമൂഹമാധ്യമങ്ങളിൽ.