'യാസ്​' ബംഗാളിൽ ബാധിച്ചത്​ ഒരു കോടി ആളുകളെ; മൂന്നു ലക്ഷം വീടുകൾക്ക്​ കേടു പറ്റിയെന്ന്​ മമത ബാനർജി

കൊൽക്കത്ത: ബംഗാളിൽ ഒരു കോടി ആളുകളെ 'യാസ്​' ചുഴലിക്കാറ്റ്​ ബാധിച്ചിട്ടുണ്ടെന്ന്​ മുഖ്യമന്ത്രി മമത ബാനർജി. മത്സ്യബന്ധനത്തിന്​ പോയ ഒരാൾ മരിച്ചതായി സ്​ഥിരീകരിച്ചിട്ടുണ്ട്​. മൂന്നു ലക്ഷം വീടുകൾക്കെങ്കിലും കേടു പറ്റിയിട്ടുണ്ടെന്നും 'യാസ്​' കൊടുങ്കാറ്റ്​ ഏറ്റവും അധികം ബാധിച്ച സംസ്​ഥാനമായി ബംഗാൾ മാറിയെന്നും അവർ പറഞ്ഞു.

15,04,506 ആളുകളെ സുരക്ഷിത സ്​ഥലത്തേക്ക്​ മാറ്റിയിട്ടുണ്ടെന്നും മമത പറഞ്ഞു. ജില്ലാ മജിസ്​ട്രേറ്റുമാരിൽ നിന്ന്​ കിട്ടിയ പ്രാഥമിക കണക്കു മാത്രമാണിതെന്നും മൂന്നു ദിവസത്തിനകം ശരിയായ കണക്കുകൾ ലഭിക്കുമെന്നും അവർ അറിയിച്ചു.

പർബ മിഡിസാപൂർ, സൗത്ത്​ 24 പർഗാനസ്​, നോർത്ത്​ 24 പർഗാനസ്​ ജില്ലകളാണ്​ ചുഴലിക്കാറ്റി​െൻറ കെടുതി അനുഭവിക്കുന്നത്​. ഇൗ മേഖലയിൽ താൻ ഉടൻ വ്യോമ നിരീക്ഷണം നടത്തുമെന്നും അവർ പറഞ്ഞു.