സ്ഥിതി ഗുരുതരം, ഒന്നിച്ചു നിൽക്കണം; മുഖ്യമന്ത്രിമാർക്ക്​ മമതയുടെ കത്ത്​

കൊല്‍ക്കത്ത: രാജ്യത്തി​​െൻറ ജനാധിപത്യം സംരക്ഷിക്കാനുള്ള പോരാട്ടത്തിൽ ഒന്നിച്ചു നിൽക്കണമെന്നാവശ്യപ്പെട്ട് രാജ്യത്തെ ബി.ജെ.പി ഇതര മുഖ്യമന്ത്രിമാർക്കും മുതിർന്ന രാഷ്​ട്രീയ നേതാക്കൾക്കും​​ ബംഗാൾ മുഖ്യമന്ത്രി മമത ബാനർജി കത്തയച്ചു​.

ബി.ജെ.പി നേതൃത്വം നൽകുന്ന കേന്ദ്ര സര്‍ക്കാറിനു കീഴിൽ​ രാജ്യത്തെ ജനാധിപത്യം ഭീഷണി നേരിടുകയാണെന്നും ഇതിനെതിരെ യോജിച്ച് പ്രവര്‍ത്തിക്കേണ്ട സമയമാണിതെന്നും മമത കത്തിൽ ചൂണ്ടിക്കാട്ടി.

ദേശീയ പൗരത്വ പട്ടികയുടെയുടെയും പൗരത്വ ഭേദഗതി നിയമത്തി​​െൻറയും പശ്ചാത്തലത്തിൽ രാജ്യത്തെ സ്ത്രീകളും കുട്ടികളും കര്‍ഷകരും തൊഴിലാളികളും പട്ടികവര്‍ഗ വിഭാഗക്കാരും മറ്റ് ന്യൂനപക്ഷവും ഉൾപ്പെടെ ജാതി മത വ്യത്യാസമില്ലാതെ രാജ്യ​ത്തെ പൗരൻമാർ ഭയപ്പാടിലാണ്​. ഈ സാഹചര്യം ഏറെ ഗൗരവതരമാണ്. എന്നത്തേക്കാളുപരി നമ്മള്‍ ഒരുമിച്ച് നില്‍ക്കേണ്ട സമയമാണിതെന്നും ഏറെ അസ്വസ്ഥമായ മനസോടെയാണ്​ കത്ത്​ എഴുതുന്നതെന്നും മമത വ്യക്തമാക്കി.

കോൺഗ്രസ്​ ഇടക്കാല അധ്യക്ഷ സോണിയ ഗാന്ധി, ശരദ് പവാര്‍, വൈ.എസ്.ആര്‍ കോണ്‍ഗ്രസ് നേതാവ്‌ ജഗന്‍ മോഹന്‍ റെഡ്ഡി, കേരള മുഖ്യമന്ത്രി പിണറായി വിജയന്‍ ഉള്‍പ്പെടെ പ്രതിപക്ഷ നിരയിലെ എല്ലാ മുഖ്യമന്ത്രിമാര്‍ക്കും കത്തി​​െൻറ പകര്‍പ്പ് അയച്ചിട്ടുണ്ട്.