കേന്ദ്രസർക്കാർ തെറ്റിദ്ധരിപ്പിക്കുന്നു; സാമ്പത്തിക പാക്കേജ്​ വെറും വട്ട പൂജ്യമെന്ന്​ മമത

കൊൽക്കത്ത: കേന്ദ്ര സർക്കാർ പ്രഖ്യാപിച്ച സാമ്പത്തിക പാക്കേജിനെതിരെ രൂക്ഷ വിമർശിച്ച്​ പശ്ചിമ ബം​ഗാൾ മുഖ്യമന്ത്രി മമത ബാനർജി. സംസ്ഥാനങ്ങളെ സഹായിക്കാൻ ഒന്നുമില്ലാത്ത സാമ്പത്തിക പാക്കേജ് ഒരു വട്ട പൂജ്യമാണെന്ന് മമത പറഞ്ഞു. ജനങ്ങളെ തെറ്റിധരിപ്പിക്കുന്ന പാക്കേജാണിത്​. സംസ്ഥാനങ്ങളെ സാമ്പത്തിക ലോക്ക് ഡൗണിൽ തളച്ചിടുകയാണ് കേന്ദ്രം എന്നും മമത പ്രതികരിച്ചു.

‘‘കേന്ദ്രം പ്രഖ്യാപിച്ച സാമ്പത്തിക ഉത്തേജന പാക്കേജ് വെറുമൊരു വട്ടപൂജ്യമാണ്. ആളുകളുടെ കണ്ണിൽ പൊടി ഇടാൻ അല്ലാതെ മറ്റൊന്നും അതിൽ ഇല്ല. അസംഘടിത മേഖലക്ക്​ വേണ്ടിയും, പൊതുമേഖല സ്ഥാപനങ്ങൾക്ക് വേണ്ടിയും തൊഴിലിനും വേണ്ടിയും ഒരു സഹായവും പാക്കേജിൽ ഇല്ല’’-  മമത പറഞ്ഞു.

 പ്രധന മന്ത്രി 20 ലക്ഷം കോടി രൂപയുടെ പാക്കേജ് പ്രഖ്യാപിച്ചപ്പോൾ സംസ്ഥാനങ്ങളുടെ താത്പര്യം കൂടി പരി​ഗണിക്കുമെന്ന്  പ്രതീക്ഷ ഉണ്ടായിരുന്നു. എന്നാൽ ധനമന്ത്രി നിർമല സീതരാമ​​െൻറ  പ്രഖ്യാപനത്തോടെ എല്ലാ ഇല്ലാതായി. പ്രധാനമന്ത്രി പറഞ്ഞതെല്ലാം വെറും നാടകമാണെന്നും ധനമന്ത്രി തെളിയിച്ചു. അവർ കൂട്ടിച്ചേർത്തു. 

കർഷകരുടെ കടം എഴുതി തള്ളാത്തതിനെതിരെയും മമത വിമർശിച്ചു. സംസ്ഥാനങ്ങൾക്ക്​ ഫണ്ട്​ അനുവദിക്കാതെ   വീണ്ടും ദുരിതത്തിൽ ആക്കുന്നതാണ് കേന്ദ്രത്തിന്റെ പാക്കേജ് എന്നും അവർ കൂട്ടിച്ചേർത്തു.

പശ്ചിമ ബം​ഗാൾ ധനവകുപ്പ് മന്ത്രി അമിത് മിത്രയും സംസ്ഥാനങ്ങളെ അവ​ഗണിച്ചുകൊണ്ടുള്ള കേന്ദ്രത്തിൻെറ സാമ്പത്തിക പാക്കേജിനെതിരെ രൂക്ഷ വിമർശനം ഉന്നയിച്ചു. രാജ്യത്തിൻെറ ജി.ഡി.പി വളർച്ച പത്ത് ശതമാനത്തിലേക്ക് എത്തിക്കാനുള്ള പദ്ധതിയാണ് പാക്കേജിൽ ഉൾപ്പെടുത്തിയത് എന്ന് പരസ്യം ചെയ്തെങ്കിലും രണ്ട് ശതമാനം വളർച്ചക്കായി ഉള്ള കാര്യങ്ങൾ പോലും പാക്കേജിൽ ഇല്ലെന്നും അ​േദ്ദഹം ചൂണ്ടിക്കാട്ടി.