യു.പിയിൽ ബി.ജെ.പി വൻ തിരിച്ചടി നേരിടും -മമത

കൊൽക്കത്ത: ബി.ജെ.പി​ ഉത്തർ പ്രദേശിൽ വൻ തിരിച്ചടി നേരിടുമെന്ന്​ ബംഗാൾ മുഖ്യമന്ത്രി മമത ബാനർജി. കേന്ദ്രത്തിൽ ഭ രണം പ്രതീക്ഷിക്കണമെങ്കിൽ ഏതൊരു പാർട്ടിയും നല്ല പ്രകടനം കാഴ്​ചവെക്കണം. ബി.ജെ.പി പരാജയപ്പെട്ടിരിക്കുകയാണ്​. അ വർക്ക്​ 80ൽ 17 സീറ്റുകൾ പോലും നേടാനാകില്ല - മമത പറഞ്ഞു. കോൺഗ്രസിന്​ ഏഴു മതൽ എട്ടു സീറ്റുവരെ കിട്ടും. മായാവതിയും അഖിലേഷുമാണ്​ നല്ല പ്രകടനം കാഴ്​ചവെക്കുകയെന്നും മമത വ്യക്​തമാക്കി.

2014ൽ ബി.ജെ.പി യു.പിയിൽ 70 സീറ്റുകളും സഖ്യ കക്ഷിയായ അപ്​നാ ദൾ രണ്ടു സീറ്റുകളും നേടിയിരുന്നു. ഇതാണ്​ ലോക്​ സഭയിൽ വൻ ഭൂരിപക്ഷം നേടാൻ ബി.ജെ.പിയെ സഹായിച്ചത്​. മൂന്ന്​ ദശകങ്ങൾക്കിടെ ആദ്യമായായിരുന്നു​ ഒരു പാർട്ടി തനിച്ച്​ ലോക്​സഭയിൽ ഇത്രയും ഭൂരിപക്ഷം നേടിയത്​.

പ്രതിപക്ഷ സഖ്യത്തെ പ്രധാനമന്ത്രി കിച്ച്​ഡി എന്ന്​ പരിഹസിച്ചതിനെതിരെയും മമത പ്രതികരിച്ചു. കിച്ച്​ഡിക്ക്​ എന്താണ്​ കുഴപ്പം. ചോറ്​, പരിപ്പ്​, ഉരുളക്കിഴക്ക്​ കറി ഇവ ഒരുമിച്ചായാൽ കിച്ച്​ഡിയായെന്നും മമത പറഞ്ഞു.

മോദിയുടെ രാഷ്​ട്രീയ പ്രതികരണങ്ങൾ നിലവാരമില്ലാത്തവയാണെന്ന്​ കുറ്റപ്പെടുത്തിയ മമത പ്രധാനമന്ത്രി സ്വന്തം സ്​ഥാനം തിരിച്ചറിയണമെന്നും ജനങ്ങൾ അദ്ദേഹത്തെ ശ്രദ്ധിക്കുന്നുണ്ടെന്ന്​ മനസിലാക്കണമെന്നും ഓർമിപ്പിച്ചു. ഫാസിസ്​റ്റുകളേക്കാൾ മോശമാണ്​ മോദിയെന്നും അവർ കൂട്ടിച്ചേർത്തു.