നിയന്ത്രണരേഖയിൽ പാക്​ വെടിവെപ്പ്; മലയാളി സൈനികന്​ വീരമൃത്യു

ജമ്മു: നിയന്ത്രണരേഖയിൽ പാക്​ ഭാഗത്തുനിന്നുള്ള ‘സ്​നൈപർ’ ആക്രമണത്തിൽ മലയാളി സൈനികന്​ വീരമൃത്യു. ജമ്മു-കശ്​മ ീരിലെ പൂഞ്ച്​ ജില്ലയിൽ അതിർത്തിക്കപ്പുറത്തുനിന്ന്​, ദീർഘദൂരത്തേക്ക്​ വെടിയുതിർക്കാവുന്ന സ്​നൈപർ തോക്കുപയോഗിച്ചുള്ള ആക്രമണത്തിലാണ്​ ലാൻസ്​ നായ്​ക്​ എറണാകുളം മണക്കുന്നം സ്വദേശി ആൻറണി സെബാസ്​റ്റ്യൻ (34) കൊല്ലപ്പെട്ടതെന്ന്​ പ്രതിരോധവൃത്തങ്ങൾ അറിയിച്ചു. തൃപ്പൂണിത്തുറ ഉദയംപേരൂർ സ്​റ്റെല്ല മേരീസ് പബ്ലിക് സ്കൂളിന്​ തെക്കുഭാഗം കറുകയിൽ വീട്ടിൽ പരേതനായ മൈക്കിളി​​െൻറയും ഷീലയുടെയും മകനാണ്. ​തമിഴ്​നാട്​ സ്വദേശിയായ ഹവിൽദാർ മാരിമുത്തുവിന്​ ഗുരുതരമായി പരിക്കേറ്റതായും സൈനികവൃത്തങ്ങൾ അറിയിച്ചു.

നിയന്ത്രണരേഖയിലെ കൃഷ്​ണഘട്ടി സെക്​ടറിൽ തിങ്കളാഴ്​ച പുലർച്ചെ അഞ്ചിനാണ്​ പാക്​ സൈന്യം വെടിനിർത്തൽ ലംഘിച്ച്​ ആക്രമണം നടത്തിയത്. ഗുരുതരമായി പരിക്കേറ്റ ആൻറണി സെബാസ്​റ്റ്യ​നെ പൂഞ്ചിലെ സൈനിക ആശുപത്രിയിലേക്ക്​ മാറ്റിയിരുന്നുവെങ്കിലും ജീവൻ രക്ഷിക്കാനായില്ല. മാരിമുത്തു ചികിൽസയിലാണ്​. ആക്രമണത്തെ തുടർന്ന്​ ഇന്ത്യൻ സൈന്യം കനത്ത തിരിച്ചടി നൽകിയതായും സേന അറിയിച്ചു. പാക്​ ഭാഗത്തെ നാശനഷ്​ടങ്ങളുടെ വിശദാംശങ്ങൾ അറിവായിട്ടില്ല.

കഴിഞ്ഞ ഏതാനും ദിവസങ്ങളായി പ്രകോപനമില്ലാതെ പാക്​ സൈന്യം നടത്തുന്ന ആക്രമണങ്ങളിൽ രണ്ടു സൈനികർക്ക്​ ജീവൻ നഷ്​ടപ്പെട്ടിരുന്നു. ഞായറാഴ്​ച നൗഷേര സെക്​ടറിലുണ്ടായ ആക്രമണത്തിൽ നായ്​ക്​ ഗോസവി കേശവ്​ സോംഗിർ (29), ശനിയാഴ്​ച റൈഫിൾമാൻ വരുൺ കട്ടാൽ (21) എന്നിവർ കൊല്ലപ്പെട്ടിരുന്നു. വെള്ളിയാഴ്​ച അഖ്​നൂർ സെക്​ടറിൽ സേനാ പോർട്ടർക്കും ജീവൻ നഷ്​ടമായിരുന്നു.

അന്ന ഡയാന ജോസഫ് ആണ്​ ആൻറണി സെബാസ്​റ്റ്യ​​​​െൻറ ഭാര്യ. ഏകമകൻ: എയ്ഡൻ. സഹോദരി: നിവ്യ. ഒരുമാസം മുമ്പ് അവധിക്ക്​ നാട്ടിൽ വന്നിരുന്നു.