​പ്രൊഫസർ ഹാനി ബാബുവിന്​ പിന്തുണയുമായി മലയാളി വിദ്യാർഥി കൂട്ടായ്മ

ഭീമ കൊറിഗാവ്​ സംഘർഷവുമായി ബന്ധപ്പെട്ട ​കേസിൽ എൻ.ഐ.എ അറസ്​റ്റ്​ ചെയ്​ത ഡല്‍ഹി സര്‍വകലാശാല അസോസിയേറ്റ്​ ​െപ്രാഫസറും മലയാളിയുമായ എം.ടി ഹാനി ബാബുവിന്​ പിന്തുണയുമായി ഡൽഹി യൂണിവേഴ്സിറ്റിയിലെ കേരള വിദ്യാർഥി കൂട്ടായ്മ ‘മൈത്രി’. അറസ്റ്റിൽ പ്രതിഷേധം രേഖപ്പെടുത്തിയ കൂട്ടായ്​മ അക്കാദമിക് മേഖലയിലുള്ളവർക്കു നേരെ നടക്കുന്ന ഉപദ്രവങ്ങളെ അപലപിക്കുകയും ചെയ്​തു. ​

മൈത്രിയുടെ പ്രസ്​താവനയുടെ പൂർണരൂപം:

ഡല്‍ഹി സര്‍വകലാശാല ഇംഗ്ലീഷ് വിഭാഗം അസോസിയേറ്റ് ​െപ്രാഫസര്‍ എം.ടി ഹാനി ബാബുവിനെതിരെ നിരന്തരമായി നടക്കുന്ന പോലീസ് വേട്ട തീർത്തും വേദനാജനകമാണ്. എൽഗർ പരിഷത്​ കേസ് അന്വേഷിക്കുന്ന ദേശീയ അന്വേഷണ ഏജന്‍സി അദ്ദേഹത്തെ മാവോയിസ്റ്റ് ബന്ധം ആരോപിച്ച് മുംബൈയിൽ അറസ്റ്റ് ചെയ്തിരിക്കുകയാണ്. ഈ മാസം 23 മുതൽ മുംബൈയിലെ എന്‍.ഐ.എ ഓഫിസില്‍ അദ്ദേഹത്തെ ചോദ്യം ചെയ്ത് വരുകയായിരുന്നു എന്നാണ് അറിയാൻ കഴിയുന്നത്.

കഴിഞ്ഞ ഡിസംബറിൽ നോയിഡയിലുള്ള അദ്ദേഹത്തി​​​െൻറ വീട്ടിൽ നിന്നും പുസ്തകങ്ങളും ലാപ്ടോപും നേരത്തെ കേസ് അന്വേഷിച്ചു കൊണ്ടിരുന്ന പുനെ പോലീസ് പിടിച്ചെടുത്തിരുന്നു. അക്കാദമിക് മെറ്റീരിയൽസ് ഉൾപ്പടെ പിടിച്ചെടുത്തവ ഇതുവരെ അദ്ദേഹത്തിന് തിരിച്ചു നൽകിയിട്ടില്ല.

ഫാസിസ്റ്റ് ഭരണകൂടങ്ങൾക്കെതിരെ നിരന്തരം  ശബ്ദമുയർത്തുന്ന ​െപ്രാഫ. ഹാനി ബാബു ഡൽഹി യൂണിവേഴ്സിറ്റിയിലെ 
ജാതിവിരുദ്ധപ്രവർത്തനങ്ങളിലും പ്രൊഫസർ സായി ബാബ ഉൾപ്പടെയുള്ള രാഷ്ട്രീയ തടവുകാരുടെ വിമോചനത്തിനു വേണ്ടിയുള്ള പ്രവർത്തനങ്ങളിലും സജീവമായി രംഗത്തുണ്ടായിരുന്നയാളാണ്.

ഡൽഹി യൂണിവേഴ്സിറ്റി കേരള വിദ്യാർത്ഥി കൂട്ടായ്മ ആയ മൈത്രി, ​െപ്രാഫസർ ഹാനി ബാബുവിന്റെ അറസ്റ്റിൽ പ്രതിഷേധം രേഖപ്പെടുത്തുകയും അക്കാദമിക് മേഖലയിലുള്ളവർക്കു നേരെ നടക്കുന്ന ഉപദ്രവങ്ങളെ അപലപിക്കുകയും,  അതോടൊപ്പം ​െപ്രാഫസർ ഹാനി ബാബുവിന് എല്ലാവിധ പിന്തുണയും ഐക്യദാർഢ്യവും പ്രഖ്യാപിക്കുകയും ചെയ്യുന്നു.